A Biblioteca de Galicia realizará un ciclo de relatorios con dez escritores sobre as súas influencias
O obxectivo da iniciativa non se centrará na obra dos autores, senón doutras obras singulares da literatura galega que marcasen o seu traballo como lectores e tamén como creadores. As sesións celebraranse no auditorio Neira Vilas da Biblioteca de Galicia, na Cidade da Cultura.
Por E.P. | SANTIAGO DE COMPOSTELA | 07/04/2021 | Actualizada ás 19:18
A Biblioteca de Galicia acollerá ata o mes de outubro un novo ciclo de relatorios no que dez dos escritores galegos máis representativos do momento compartirán co público as súas experiencias e influencias literarias sobre un libro da literatura galega que marcase a súa traxectoria. Trátase de '10 anos, 10 autores, 10 libros', que comezará este venres e que se enmarca nos actos do décimo aniversario da Biblioteca.
O obxectivo da iniciativa non se centrará na obra dos autores, senón doutras obras singulares da literatura galega que marcasen o seu traballo como lectores e tamén como creadores. As sesións celebraranse no auditorio Neira Vilas da Biblioteca de Galicia, na Cidade da Cultura.
A primeira xornada será este venres, ás 19,00 horas, e correrá a cargo da escritora Arantza Portabales, autora de Beleza Vermella, que falará, entre outros temas, da pegada que tivo na súa traxectoria persoal e literaria a obra de Manuel Rivas 'Que me queres, amor?'.
Os seguintes participantes serán a escritora Ledicia Costas (venres 23 de abril), Domingo Villar (4 de xuño), María Solar (18 de xuño) e María Canosa (2 de xullo). A iniciativa continuará nos meses de setembro e outubro. Todos os relatorios celébranse ás 19,00 horas, contan con entrada gratuíta previa inscrición na web da Cidade da Cultura e teñen aforamento limitado a 27 persoas. Tamén serán transmitidas en directo na canle de Youtube da Cidade da Cultura.
