Este é o modelo de residencias que propón a Xunta
Aposta pola coordinación sociosanitaria, melloras arquitectónicas e tecnoloxía.
Por E.P. | Santiago de Compostela | 15/04/2021 | Actualizada ás 16:46
O director xeral de Atención Integral Sociosanitaria, Antón Acevedo, destacou este xoves que o novo modelo de residencias que prepara a Xunta de Galicia "atenderá as necesidades evidenciadas tras a pandemia da covid-19 e mellorará estes servizos para a nova era que comeza".
Así o manifestou durante a súa intervención na mesa redonda organizada por EAPN baixo o título 'Experiencias de maiores durante a pandemia: a necesidade dun cambio no modelo sociosanitario', na que participaron tamén as conselleiras da área social de Asturias e País Vasco.
Na súa intervención, Acevedo subliñou que, entre os obxectivos deste novo modelo, estará unha maior coordinación sociosanitaria, melloras arquitectónicas e a aposta pola tecnoloxía. No proxecto do novo modelo xa traballa o comité asesor sociosanitario creado polo Goberno galego e no que participan persoas de todos os ámbitos implicados.
O director xeral apuntou que este novo modelo buscará extraer "todas as leccións e experiencias vividas" nos últimos meses nas residencias, ampliar a participación de todos os axentes implicados nos coidados das persoas maiores e lograr así do máximo consenso.
