Por Galicia Confidencial | SANTIAGO DE COMPOSTELA | 19/04/2021 | Actualizada ás 22:20
Lea en Ribeira por mor da construción dunha nova estrada en Ribeira. A chamada ‘variante’, que pretende rodear a vila para desconxestionar o tráfico da cidade, está a congregar a un grupo de veciños moi críticos co “asoballamento” que, aos seus ollos, está a ter lugar neste proxecto da man de Alberto Núñez Feijóo e Manuel Ruíz Rivas, alcalde do concello.
A cuestión da variante estaría, por un lado, en que o proxecto implicaría expropiar a máis de 200 propietarios, que verían como as súas leiras --moitas delas urbanas-- pasan a ser rústicas. Esta cuestión, apuntan dende a Coordinadora de Afectados pola Variante de Ribeira, xa foi posta en coñecemento da Defensora do Pobo. Con todo, a problemática máis seria deste novo vial atoparíase nos riscos construtivos que esta “perigosa variante” implicaría por mor dun aparente desentendemento da Xunta.
De acordo coas mesmas fontes, parte dos terreos sobre os que se asentaría o vial están catalogados como “zona perigosa para a construción” polo Instituto Xeolóxico e Mineiro de España. O problema estaría en que, sinalan os veciños, a Xunta non realizou “as preceptivas sondaxes nas terras”. De acordo coas mesmas fontes, todas estas cuestións levaron a que o pleno do Concello de Ribeira aprobara un documento no que se exixía ao alcalde que solicitara á Xunta á paralización do proxecto.
"INTERESES" NA ZONA
Porén, subliñan, a iniciativa segue en marcha e da análise independente que se solicitou non se sabe aínda nada. Dende a veciñanza vense “asoballados e coa boca pechada grazas á presión dos dirixentes locais e autonómicos do partido popular”, entre os cales sinalan de xeito especial ao propio alcalde, ao que acusan de “ter intereses na zona por onde vai entrar a variante”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.