Por E.P. | Santiago de Compostela | 23/04/2021 | Actualizada ás 16:25
A Xunta realizará un inventario das infraestruturas que existen nas marxes dos ríos das 170 áreas con maior risco de inundacións da Demarcación Hidrográfica Galicia-Costa. Así, a Consellería de Infraestruturas e Mobilidade, a través de Augas de Galicia, publica este venres na Plataforma de Contratos Públicos da Xunta a licitación deste contrato de servizo, cun investimento de case 1,3 millóns de euros.
As empresas interesadas nestes traballos poderán presentar as súas ofertas ata o próximo día 3 de xuño. Os traballos contan cun prazo de execución de 18 meses.
O obxectivo é analizar todas as áreas fluviais delimitadas de forma provisional no novo Plan de xestión de risco de inundación de Galicia-Costa, correspondente ao ciclo 2021-2027, e que suman unha lonxitude total de 548 quilómetros de río.
Por unha banda, os traballos consistirán en identificar as infraestruturas de defensa lonxitudinal fronte a inundacións e protección de marxes ao longo destas áreas de risco.
A catalogación permitirá recompilar e inventariar todas as infraestruturas na contorna destes ríos e rexistralas, para posteriormente establecer unha estratexia para a redución do risco de inundación, á vez que se garante o correcto funcionamento da estrada ou ferrocarril en situacións de avenida.
No marco deste traballo, formularanse distintas solucións técnicas para a mellora do funcionamento destas infraestruturas e, ao mesmo tempo, proporase unha priorización das posibles medidas, atendendo ao perigo, risco e importancia das mesmas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.