O Sergas cita máis de 5.600 mozos de Carballo e máis de 2.000 veciños de Ourense a cribados

O Servizo Galego de Saúde (Sergas) prosegue cos cribados para detectar posibles casos de Covid-19 entre persoas asintomáticas, no marco dos que citou a máis de 5.600 mozos en Carballo e a máis de 2.000 veciños do barrio da Ponte en Ourense, entre outros.

Segundo informou a área Sanitaria da Coruña e Cee, desde este mércores día 5, ata o venres 7 de maio, terá lugar no concello de Carballo un cribado poboacional mediante test PCR a veciños de entre 20 e 39 anos.

As probas levaranse a cabo no Centro de Saúde de Carballo, onde están convocados todos os veciños deste concello pertencentes á franxa de idade establecida, uns 5.650 aproximadamente, citados mediante mensaxe SMS en horario de 16,00 a 21,00 horas este mércores, e de 9,00 a 14,00 horas e de 16,00 a 21,00 horas, o xoves e o venres.

Pola súa banda, a área Sanitaria de Ourense, Verín e Ou Barco convocará este sábado a un cribado poboacional selectivo aleatorio a 2.000 veciños do barrio ourensán da Ponte de entre 30 e 60 anos.

Este cribado terá lugar no Pavillón Deportivo de Oira entre as 8,30 e as 14,00 horas e nel participarán sete enfermeiras e catro técnicos de coidados auxiliares de enfermaría.

O índice acumulado a 14 días na Ponte, 137 casos por 100.000 habitantes, é superior á media do concello de Ourense, que se sitúa no mesmo período en 80,3, e supera a taxa de casos activos entre os usuarios do resto de centros de saúde da cidade.

"A incidencia desta área da cidade está dentro dun parámetro contido, e con esta iniciativa séguese a liña de anticipación e control, para limitar os contagios e profundar no coñecemento da situación epidemiolóxica, do Concello de Ourense que, a día de hoxe, conta con 99 casos activos", indica a área sanitaria.