Estado e a Deputación coruñesa recorren a retirada de mobles de Meirás mentres a Xunta encarga informes
Estes recursos súmanse aos xa anunciados polos Concellos da Coruña e Sada.
Por Galicia Confidencial | A Coruña | 06/05/2021 | Actualizada ás 11:54
A Avogacía do Estado e a Deputación da Coruña presentaron un recurso de reposición contra a dilixencia do Xulgado de Primeira Instancia número 1 da Coruña que concede un mes ao Franco para que retiren os bens do Pazo de Meirás. Así o informaron este xoves nunha rolda de prensa o delegado do Goberno en Galicia, José Miñones, e o presidente da Deputación da Coruña, Valentín González Formoso.
Estes recursos súmanse aos xa anunciados polos Concellos da Coruña e Sada sobre a decisión xudicial de conceder un mes aos herdeiros do ditador para levar o mobiliario. "Seguimos no camiño de defender que os bens inventariados continúen protexidos", explicou González Formoso.
Pola súa banda, Miñones dixo que é "un primeiro paso" e asegurou que a Avogacía do Estado segue traballando para "defender un ben público" e o "patrimonio do Estado".
A Xunta xa encargou informes a diferentes institucións para evitar con "solvencia técnica e xurídica" que os Franco se poidan levar os Bens de Interese Cultural (BIC) do Pazo de Meirás, e onte o Parlamento galego instou os Gobernos central e autonómico a "impedir un novo saqueo" do Pazo de Meirás e incluír os bens mobles na protección como BIC.EFE
