Simón non descarta unha "cuarta onda" como consecuencia das festas deste fin de semana
"Agora mesmo non o sei, nin eu nin ninguén en España pode saber cantas persoas van volver a ingresar na UCI", asegura.
Por Europa Press / Redacción | MADRID | 10/05/2021 | Actualizada ás 19:51
O director do Centro de Coordinación de Alertas e Emerxencias Sanitarias do Ministerio de Sanidade, Fernando Simón, confía en que as festas deste fin de semana provoquen un "pico puntual" de contaxios por coronavirus, aínda que non descarta que poida producirse unha "cuarta onda" como consecuencia destas celebracións sen máscaras e sen distancia.
"Ata hai dous días diría que podiamos esperar que continuase a tendencia descendente dos últimos 10-12 días, que tiñamos a oportunidade importante de non ter unha cuarta onda, pero agora mesmo non o sei, nin eu nin ninguén en España pode saber cantas persoas van volver a ingresar na UCI", advertiu Simón este luns en rolda de prensa.
Neste sentido, Simón mostrouse "non enfadado pero si decepcionado" ao ver as imaxes deste fin de semana, de centos de mozos celebrando o fin do Estado de Alarma na rúa sen cumprir as recomendacións sanitarias.
"Como país imos saír mellores pero non quere dicir que todos, sempre hai xente que non pertence ao grupo dos sensatos. Non estou enfadado, si decepcionado, moito, probablemente ata comigo porque non fun capaz de transmitir a mensaxe á poboación, nin aos medios de comunicación nin aos políticos", sinalou.
