A Cámara reclama a Israel o "respecto absoluto" dos dereitos humanos dos palestinos
Destaca que Galicia a construír unha orde internacional xusta co amparo da legalidade internacional.
Por E.P. | SANTIAGO DE COMPOSTELA | 12/05/2021 | Actualizada ás 14:02
A Cámara galega reclamou da comunidade internacional que esixa a Israel o "respecto absoluto" dos dereitos humanos dos palestinos e palestinas, así como os dereitos colectivos deste pobo.
Con motivo do aniversario do inicio do éxodo do pobo palestino, que se celebra o 15 de maio, o Parlamento de Galicia aprobou unha declaración institucional sobre este asunto. O texto, lido polo titular do Lexislativo galego, Miguel Santalices, pide o cumprimento das resolucións das Nacións Unidas e o recoñecemento do dereito ao retorno das persoas e comunidades ás terras e casas das que foron expulsadas.
"Manifestamos o noso máis firme compromiso cos dereitos inalienables da persoa, con liberdade e co máis pleno respecto á dignidade humana", sinala a Cámara. Neste sentido, sostén que "non escatimará esforzos en contribuír desde Galicia a construír unha orde internacional xusta co amparo da legalidade internacional, un mundo en que a forza quede sempre sometida o dereito".
