A evolución da Covid en Santiago é "preocupante"; triplica a incidencia na última semana

O alcalde de Santiago, Xosé Sánchez Bugallo, mostrou este venres a súa "preocupación" pola evolución da pandemia na cidade, xa que a incidencia a sete días triplicouse na última semana.

Nunha rolda de prensa, Sánchez Bugallo explicou que non se trata de "datos alarmantes" nin cifras que, por si soas, sexan altas, pero evidencian unha tendencia "preocupante" que fai pensar que se seguirá incrementando nas próximas semanas.

Segundo contou, hai unha semana, a incidencia a sete días da capital galega era de 13 casos por 100.000 habitantes, mentres que este venres é de 41, máis de tres veces por encima. "É previsible que a cifra siga crecendo a próxima semana, e iso, indubidablemente, non é bo, e debemos facer unha chamada de atención", dixo o rexedor.

Sánchez Bugallo explicou que os datos que manexa de "comportamento" dos composteláns estes días de festas da Ascensión "son razoablemente bos", pero chamou a atención sobre o efecto do incremento da mobilidade, así como do feito de que se "afrouxen as medidas" en "ambientes máis familiares".

Sobre as festas en pisos rexistradas estes días de Ascensión, Bugallo explicou que foron "menos alarmantes" do que se temía desde o consistorio. En concreto, explicou que se interveu en cinco festas, unha cifra "non especialmente alta". "Globalmente, o comportamento foi bo", resolveu.

Terrazas de restaurantes cheas de xente durante o segundo día da apertura parcial da hostalaría en Santiago de Compostela | Fonte: Álvaro Ballesteros - Europa Press.