A Xunta apunta a crear unha zona franca en Ferrol mentres di esperar una "resposta áxil" do Goberno central
Dita proposta viría a sumar ao obxectivo de facer da comarca de Ferrolterra un polo enerxético que deberá atopar acomodo na repartición dos fondos europeos Next Generation e no que se inclúa a produción con biocombustibles na central térmica das Pontes.
Por E.P. | SANTIAGO DE COMPOSTELA | 25/05/2021 | Actualizada ás 19:14
O vicepresidente segundo e conselleiro de Economía, Empresa e Innovación, Francisco Conde, propuxo a creación dunha zona franca en Ferrol, na que a Xunta ofrecería "a súa máxima colaboración" e que implicaría a inclusión do porto na Rede Transeuropea de Transportes.
Así llo trasladou o integrante do Goberno galego a varios alcaldes da comarca de Ferrolterra nun encontro que mantiveron á primeira hora da tarde deste martes, 25 de maio, en Santiago, dentro da iniciativa da posta en marcha dun Pacto de Estado por Ferrol, para tratar de buscar solucións á falta de oportunidades laborais e ao declive industrial que está a sufrir a zona norte da provincia da Coruña.
Dita proposta viría a sumar ao obxectivo de facer da comarca de Ferrolterra un polo enerxético que deberá atopar acomodo na repartición dos fondos europeos Next Generation e no que se inclúa a produción con biocombustibles na central térmica das Pontes, a consolidación do gas natural licuado (GNL), a xeración de hidróxeno verde ou o desenvolvemento da eólica mariña a través dun Hub offshore.
AGARDANDO POLO GOBERNO CENTRAL
Ademais de con alcaldes, Conde tamén mantivo encontros con representantes sindicais e empresariais, nos que lles detallou que o Goberno da Xunta espera "unha resposta áxil e o máis rápida posible por parte do Goberno central", tras o envío o 14 de maio da proposta.
Unha resposta que, segundo Conde, debe de vir en forma de investimentos e con novas propostas que se somen ao pacto. Francisco Conde tamén volveu a realizar unha chamada "á unidade, ao consenso e á implicación de todos os actores para dar unha resposta que permita ás comarcas de Ferrol, Eume e Ortegal saír máis fortalecidas desta crise".
