Por E.P. | SANTIAGO DE COMPOSTELA | 29/05/2021 | Actualizada ás 18:26
Un proxecto piloto de ampliación do estudo de contactos posto en marcha polo Servizo Galego de Saúde (Sergas) permitiu detectar 33 casos de covid-19 entre o 7 e o 21 de maio. A iniciativa, coñecida como 'retrorrastrexo', buscaba optimizar o proceso de seguimento de contactos para identificar a un maior número de casos con infección activa e descubrir cadeas de transmisión do virus que permaneceran ocultas, segundo explicou o Sergas.
Deste xeito, ampliouse a procura de contactos á semana anterior ao comezo dos síntomas da positiva fronte ao período de dous días analizado ata a data. Tamén se incluíu no seguimento ás persoas que non foron contactos estreitos, pero que puideron reunirse coa diagnosticada da covid-19 en ámbitos concretos, como o laboral, o deportivo ou o de lecer.
No marco deste proxecto retrorrastrexáronse 372 casos mediante a Central de seguimento de contactos (CSC) e identificáronse 1.001 contactos casuais. A estes últimos facilitáronselles medidas preventivas e pedíuselles realizar unha proba PCR, aínda que non se lles requiriu gardar corentena.
A realización de probas PCR a contactos identificados permitiu detectar 33 novos casos, o que supuxo unha taxa de positividade do 5% en respecto dos resultados dispoñibles o día da análise. Ademais, unha enquisa de retrorrastrexo permitiu identificar a 21 contactos casuais que presentaban síntomas e derivalos de modo precoz a unha cita médica. A información recompilada deste xeito facilitou vincular a 26 dos casos, o que supuxo un 7% dos positivos orfos enquisados.
RESULTADOS
A avaliación do proxecto evidenciou unha maior positividade dos contactos que mantiveron interacción cunha persoa contaxiada nun domicilio ou nunha reunión con máis individuos. Ante os resultados obtidos, os estudos de contactos realizaranse forma sistemática no seguimento de casos de covid-19 en Galicia e o circuíto de retrorrastrexo integrarase nos sistemas de información habituais da Consellería de Sanidade.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.