Máis de 1.600 empregados públicos, chamados a participar nas oposicións para lograr un ascenso
Terán lugar o tres de xullo na feira internacional de Silleda, en Pontevedra.
Por Europa Press / Redacción | SANTIAGO DE COMPOSTELA | 31/05/2021 | Actualizada ás 12:55
Un total de 1.657 empregados públicos están chamados a participar o próximo 3 de xullo nas oposicións para lograr un ascenso ou cambio de categoría, co obxectivo de facilitar a súa progresión profesional e a conciliación da súa vida familiar e laboral.
As probas para acceder a 420 prazas dos grupos A1, A2, C1 e C2 celebraranse no recinto da feira internacional de Silleda en Pontevedra.
Os procesos selectivos de promoción interna están reservados a empregados públicos que xa teñen praza na administración, e que queren acceder a un posto de maior categoría ou que se adapta mellor ás súas preferencias sempre que os aspirantes reúnan os requisitos e superen a correspondente oposición.
A Xunta anuncia a data do exame despois de que as autoridades sanitarias autorizasen a súa celebración seguindo protocolos "que garanten a súa realización con todas as garantías sanitarias".
MAÑÁ E TARDE
Así, o sábado 3 de xullo pola mañá realizarase o exame para 46 prazas do corpo superior A1 nas que están chamados a participar 82 empregados públicos e para 195 do corpo administrativo C1 con 991 persoas convocadas.
Pola tarde terán lugar as probas para 127 prazas de corpo de xestión A2 no que están convocados 465 empregados públicos e para 52 prazas do corpo auxiliar C2 con 119 convocados.
