A Deputación de Pontevedra e a Universidade de Vigo renovan o seu compromiso anual para bolsas Erasmus+

"É dos mellores investimentos que temos en marcha, porque estamos a falar de construír a formación, as mentes que van dirixir o mundo", declarou a presidenta da Deputación, Carmela Silva.

Por E.P. | SANTIAGO DE COMPOSTELA | 07/06/2021 | Actualizada ás 17:18

Comparte esta noticia

A presidenta da Deputación de Pontevedra, Carmela Silva, e o reitor da Universidade de Vigo, Manuel Reigosa, asinaron este luns o novo convenio de colaboración por importe de 100.000 euros para completar o financiamento de 80 bolsas que se destinarán a participantes no programa comunitario Erasmus+, mentres que os 20 restantes irán dirixidas a outras iniciativas de mobilidade internacional da institución académica con países extracomunitarios.

Desde o ano 2015 mantense esta colaboración cuxa importancia subliñou Carmela Silva "neste mundo global poder enriquecerte estudando noutros países é moi relevante na formación da mocidade, xa que permite configurar mentes máis abertas e mellores cidadáns".

Manuel Reigosa, pola súa banda, asegurou estar "en total sintonía" coa presidenta provincial en canto a que "este programa é fundamental para construír unha Europa mellor e un futuro mellor, máis comprensivo e igualitario".

"É dos mellores investimentos que temos en marcha, porque estamos a falar de construír a formación, as mentes que van dirixir o mundo", insistiu Carmela Silva. Mentres, o reitor da Universidade de Vigo asinou no libro de honras da Deputación de Pontevedra onde deixou escrito o seu agradecemento á institución polo apoio á universidade ao asegurar que "xuntos somos máis fortes".

O convenio de colaboración entre a Deputación de Pontevedra e a Universidade de Vigo para a promoción da mobilidade internacional do seu alumnado terá vixencia ata o 31 de novembro de 2022. En total, ata agora o investimento da Deputación a través dos convenios asinados coa UVigo para a promoción da mobilidade internacional do seu alumnado foi de 550.000 euros e beneficiáronse 547 mozos.

A presidenta da Deputación de Pontevedra, Carmela Silva
A presidenta da Deputación de Pontevedra, Carmela Silva | Fonte: Deputación.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta