Por E.P. | SANTIAGO DE COMPOSTELA | 09/06/2021 | Actualizada ás 16:17
O presidente da Xunta, Alberto Núñez Feijóo, sinalou que Galicia afronta o Consello Interterritorial do Sistema Nacional de Saúde (CISNS) coa "vontade de chegar a acordos", pero mantén algunhas peticións como que as medidas estatais para o lecer nocturno queden en "recomendacións" e que as comunidades poidan adaptalas, así como que haxa "flexibilidade" e posibilidade de "revisalas cada 15 días" durante o verán.
O conselleiro de Sanidade, Julio García Comesaña, é un dos conselleiros aos que a titular do Ministerio, Carolina Darias, chamou nas últimas horas, confirmou Feijóo. Neste sentido, o mandatario autonómico espera que "non" queden "dúbidas" do compromiso de retirada das medidas que foron publicadas o pasado sábado no Boletín Oficial do Estado (BOE) e que sobre as que o Goberno anunciou que dará marcha atrás, deixando sen efecto os horarios marcados para a hostalaría.
"Cando se fai unha chamada en concreto, entendo que se está dicindo a verdade", apuntou Feijóo, quen dixo que as maiores incertezas radican agora en "como queda o lecer nocturno". Así, sinalou que hai comunidades, como a galega, que quere que queden "en recomendacións", pero o Ministerio de Sanidade "di que lle corresponde regulalo", posto que o pechou "baixo a súa responsabilidade" en agosto do ano pasado.
Feijóo explicitou a postura galega, que pivota en tres aspectos: a vixencia non sexa inflexible ata conseguir a inmunidade, que se revise cada 15 días e que se adecue á situación epidemiolóxica dos territorios.
"BOA PARTE NON PODIAMOS COMPARTILAS"
Feijóo non pasou por alto "o intento de impor de forma unilateral" as medidas para toda España por parte do ministerio e lembrou o auto da Audiencia Nacional que suspendeu a súa aplicación (en Madrid) por "invasión de competencias". Os servizos xurídicos galegos xa tiñan preparado un recurso ante o Tribunal Constitucional con petición de suspensión no caso de que o Goberno central non "rectificase" a postura.
"Non podiamos compartir as decisións do Goberno central por varios motivos", explicou o presidente da Xunta, antes de citar, entre outros, que suporía unha "clara invasión de competencias" e porque as medidas "ían ter unha vixencia de longo percorrido ata a inmunidade da poboación española, desatendendo" a posible actualización de cada ciclo epidemiolóxico.
Feijóo tamén observou que as medias "eran manifestamente mellorables e algunhas contraditorias", como o consumo en hostalaría con respecto ao lecer nocturno. Así, expresou a "máxima vontade de buscar acordos" e "volver tentar conseguir os maiores consensos" e, "desde logo, non medidas que se convertan en imposicións".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.