Por E.P. | SANTIAGO DE COMPOSTELA | 16/06/2021 | Actualizada ás 13:50
A Xunta manifestou o seu rexeitamento ao proxecto do Ministerio de Eduación que expón limitar os casos nos que un alumno de primaria ou secundaria debe repetir curso, unha medida que o departamento de Educación da administración galega considera que "vai en contra da igualdade de oportunidades".
"Non pode ser igual aprobar que suspender; esforzarse ou non esforzarse", resumiu o conselleiro de Educación, Román Rodríguez, a preguntas dos medios este mércores nun acto celebrado na Cidade da Cultura de Santiago. Alí, lamentou coñecer o proxecto do Goberno central "a través dos medios de comunicación", polo que emprazou a que se lles remita "o texto definitivo" para poder "ter unha visión máis explícita" sobre as medidas que expón o departamento que dirije a ministra Isabel Celáa.
En todo caso, o plan que marca o Goberno, avanzado polo diario El País este mércores, de limitar os casos nos que un alumno debe repetir curso non é compartido pola Administracción galega, que considera que, do mesmo xeito que "o decreto do aprobado xeral", esta medida "pode xerar un aspecto pernicioso no sistema".
"Hai algo básico (na educación) como é a cultura do esforzo, a motivación; que é o que garante a igualdade de oportunidades", subliñou Rodríguez, antes de engadir que "isto non quere dicir que non se atenda aos alumnos con máis dificultades". Para o conselleiro, apostar polo alumno "que se esforza" e apoiar ao que ten "dificultades" para "que non quede atrás" son "aspectos compatibles", polo que avanzou que Galicia, a expensas de coñecer en detalle a proposta do Goberno, manifestará a súa oposición a que se flexibilicen os criterios para repetir curso en primaria e secundaria.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.