Bruxelas aproba o plan de recuperación de España e achega o pago dos primeiros 9.000 millóns

A Comisión Europea aprobou este mércores o plan de recuperación elaborado polo Goberno español coas reformas e investimentos coas que quere captar as axudas do fondo anticrise da UE, un paso que achega o desembolso dos primeiros 9.000 millóns que chegarán en xullo en forma de anticipo, segundo informou a Comisión Europa este mércores.

A avaliación positiva de Bruxelas abre un prazo de catro semanas para que o plan español reciba tamén o visto e prace do resto de Estados membros. A primeira ocasión para que isto suceda será a reunión dos ministros de Economía e Finanzas da UE (Ecofin), prevista para o 13 de xullo.

A España correspóndenlle uns 140.000 millóns de euros do fondo de recuperación de 800.000 millóns co que a UE quere sacar ás economías europeas da crise provocada pola pandemia e ao mesmo tempo acelerar as transicións verde e dixital. Polo momento, o Goberno só solicitou os 69.500 millóns que chegarán en forma de transferencias e deixou para máis adiante a parte de préstamos a devolver.

19.000 MILLÓNS EN 2021

O plan aprobado este mércores destaca que España recibirá 19.000 millóns de euros do fondo de recuperación da Unión Europea en 2021 e terá que ir desbloqueando novos tramos cada seis meses a medida que cumpre cunha serie de obxectivos e fitos pactados coa Comisión Europea.

A cifra é inferior aos 27.000 millóns que se incluíron como estimación nos Orzamentos Xerais para este ano. Durante a rolda de prensa conxunta entre Von der Leyen e Pedro Sánchez, o presidente do Goberno asegurou que esta diferenza "é perfectamente asumible polo Goberno de España".

Doutra banda, Sánchez enxalzou que España foi dos primeiros países en presentar o seu Plan de Recuperación e de recibir a aprobación por parte de Bruxelas. "Supón un recoñecemento ao traballo ben feito", salientou, tras asegurar que a Comisión Europea confirmou que as reformas e os investimentos cumpren de "forma satisfactoria" con todos os obxectivos.

"Estas reformas farán que España saia da pandemia máis forte que nunca", subliñou Von der Leyen, tras destacar que o plan presentado cumpre cos criterios "moi esixentes" que marcara a Comisión. Aínda que desde Bruxelas indicouse esta semana que os primeiros desembolsos se realizarían en agosto, a xefa do Executivo comunitario asegurou que se producirán en xullo.

O presidente do Goberno cualificou o día de hoxe como "histórico" para España e para Europa e sinalou que os dous plans de recuperación aprobados, o de Portugal e o de España, abren a porta a unha nova forma de entender a Unión, de cooperar e de dar resposta aos desafíos.