Feijóo: "Os indultos son o salvoconduto que ten o Goberno para sustentarse no Goberno"

O presidente da Xunta, Alberto Núñez Feijóo, referiuse de novo este sábado aos posibles indultos aos políticos cataláns presos, que considera un "erro". Neste sentido, o líder dos populares galegos advertiu que esta situación "atípica" beneficiará máis ao Goberno central "que ao indultado", posto que esta medida representa "o salvoconduto" do Executivo de Pedro Sánchez para "sustentarse".

"O indulto é o salvoconduto que ten o Goberno para sustentarse no Goberno", sinalou Feijóo, algo que "nunca ocorrera na democracia española", engadiu. "Nunca un Goberno se indultara a si mesmo indultando a un socio parlamentario", insistiu, do mesmo xeito que nunca se aprobou un indulto en contra "da sala do Tribunal Supremo e en contra da Fiscalía Xeral do Estado".

Así se pronunciou preguntado sobre as palabras de Isabel Díaz Ayuso respecto ao papel do rei Felipe VI na firma dos indultos. O presidente autonómico non advertiu, respecto diso, "ningunha polémica", senón "unha preocupación perfectamente democrática e razoable" pola "situación atípica" que provoca este "conflito de intereses".

"O importante é que neste momento non se dan as condicións para ese indulto e o importante é que podemos estar ante un erro", engadiu.

Feijóo considerou que este erro se está vendo "desde o principio", coa "falta de respecto" do presidente da Generalitat, Pere Aragonés, ao Xefe do Estado ou ao propio presidente Sánchez. "Creo que iso é o importante e o demais son anécdotas que non merecen a maior preocupación política", resolveu.

O presidente galego acudiu a Madrid á toma de posesión de Ayuso como presidenta da Comunidade, e agradeceu a volta da "estabilidade" ao Goberno autonómico tras a forma "tan contundente e tan clara" coa que falaron os madrileños nas eleccións.

Neste sentido, felicitou á súa "compañeira de partido", que "gañou limpamente", e puxo en valor "a divisa da estabilidade política" nunha "España convulsa" e que conta cun Goberno central "que cada martes ten que pactar con calquera partido a calquera prezo".

Preguntado pola posibilidade de exportar o 'Modelo Ayuso', Feijóo matizou que se trata "dunhas eleccións autonómicas" nas que "o ámbito territorial é a Comunidade de Madrid. "Nunhas eleccións en Galicia as propostas para Galicia son para a comunidade galega e así sucesivamente, estas non son unhas eleccións xerais, son autonómicas".