A Audiencia Nacional condena a Paradores a indemnizar ao seu persoal polas súas medidas durante o peche forzoso

A empresa decidiu conceder unha licenza excusadora de traballar aos empregados.

Por Europa Press / Redacción | Madrid | 22/06/2021 | Actualizada ás 16:49

Comparte esta noticia

A Audiencia Nacional condenou a Paradores a indemnizar aos traballadores que non prestaron servizos a causa do peche dos establecementos no período de 12 de abril ao 24 de xuño de 2020. Neste período, Paradores concedeu ao seu persoal unha licenza excusadora de traballar.

Parador de Baiona (Pontevedra). PARADORES - Arquivo
Parador de Baiona (Pontevedra). PARADORES - Arquivo | Fonte: Europa Press

CC.OO., UGT e CSIF demandaron á empresa porque entendían que esta medida supuña unha diminución retributiva para os traballadores. Agora, a Audiencia Nacional deu a razón aos sindicatos demandantes argumentando que a empresa puido pór en marcha procedementos de suspensión de contratos.

Ao iniciarse o confinamento pola pandemia que supuxo o peche forzoso dos Paradores de Turismo, empresa e a representación legal das persoas traballadoras (RLPT) acordaron un sistema de repartición de prima de produción e devolución de tempo. Este acordo estivo vixente ata o 11 de abril de 2020.

Os sindicatos denuncian que, a partir desta data, a empresa, tras romper as negociacións, "impuxo o seu criterio". Entre outras cousas, os sindicatos propuxeron a Paradores que aplicase un ERTE, mecanismo establecido polo Goberno para evitar a perda de emprego durante a pandemia, pero segundo a sentenza da Audiencia Nacional Paradores negouse alegando "razóns de oportunidade política".

A empresa decidiu conceder ao seu persoal unha "licenza excusadora de traballar", medida contra a que RLPT presentou unha demanda ao entender que supuña unha "diminución retributiva" para o persoal, posto que deixaron de percibir unha serie de pluses, complementos e primas.

A Audiencia Nacional, que estima parcialmente a demanda presentada polos sindicatos, entende que a situación descrita puido "perfectamente liquidarse pola empresa" facendo uso dos recursos legais postos á súa disposición e que pasaban por incoar procedementos de suspensión de contratos.

"Ao non acudir a demandada á canle da suspensión de contratos que lle proporcionaba o ordenamento, colócase en situación debedora cos traballadores con relación á parte do contrato de traballo que lle correspondía cumprir: o abono dos salarios que deberon percibir como contraprestación a un traballo que non prestaron por decisión empresarial unilateral", asegura a sentenza.

Por todo iso o Tribunal recoñece que os traballadores da Rede de Paradores que non prestaron servizos con causa no peche dos establecementos no período do 12 de abril ao 24 de xuño de 2020 "deben ser resarcidos" en canto á prima de produción, ao complemento de manutención, ao plus de nocturnidade e ao plus de quenda partida.

Para CC.OO. esta sentenza é "moi importante" non só porque vai permitir que o persoal recupere o salario , senón tamén "porque deixa en evidencia a actitude dunha empresa de titularidade pública que puxo a oportunidade política" por diante do benestar dos seus traballadores e traballadoras". O sindicato confía en que Paradores asuma a sentenza e a aplique "canto antes".

Paradores poderá interpor un recurso de casación ante o Tribunal Supremo, que poderá prepararse ante esta Sala do Social da Audiencia Nacional no prazo de cinco días hábiles desde a notificación.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta