O procedemento de declaración BIC da Casa Cornide dá un paso máis coa publicación no BOE
A resolución foi ditada pola Dirección Xeral de Patrimonio Cultural da Xunta de Galicia.
Por Europa Press / Redacción | A Coruña | 22/06/2021 | Actualizada ás 17:17
O procedemento de declaración como Ben de Interese Cultural (BIC) da Casa Cornide da Coruña, en mans dos herdeiros do ditador Francisco Franco, deu un paso máis coa publicación da resolución ditada a este respecto pola Dirección Xeral de Patrimonio Cultural da Xunta de Galicia.
En concreto, o BOE publica este martes a resolución de 14 de maio da Dirección Xeral de Patrimonio Cultural da Consellería de Cultura, Educación e Universidades para a incoación do procedemento para declarar ben de interese cultural (BIC) o inmoble, en base á petición formulada polo consistorio coruñés.
Este edificio, situado na cidade vella da Coruña, goza desde o mes de maio deste réxime de protección patrimonial tras, á súa vez, a publicación oficial do expediente no Diario Oficial de Galicia (DOG).
Isto supuxo a aplicación do marco de protección que establece a Lei de Patrimonio Cultural de Galicia para os BIC, unha consideración que estará vixente ata a resolución do proceso, para a que existe un prazo de 24 meses a contar desde o 24 de maio. Agora, o BOE publica a petición do Concello da Coruña e os argumentos dados, así como a resolución da Xunta a este respecto.
