O PSdeG denuncia a "ineficiencia" e "incerteza" das medidas da Xunta respecto ao macrobrote de Mallorca
Julio Torrado avanza que presentará na Cámara galega unha serie de iniciativas para denunciar as "ineficiencias".
Por Europa Press / Redacción | SANTIAGO DE COMPOSTELA | 30/06/2021 | Actualizada ás 20:06
O portavoz de Sanidade do PSdeG, Julio Torrado, avanzou que presentará na Cámara galega unha serie de iniciativas para denunciar as "ineficiencias" na información e as medidas trasladadas pola Xunta respecto ao macrobrote de Mallorca.
Nun comunicado, o parlamentario reclama á Xunta que faga algo máis que alertar fronte aos botellóns e sinala que a "incerteza" sobre a súa actuación trasládase ao conxunto dos cidadáns, que "non teñen a posibilidade de saber canto de controlada está a situación".
Así mesmo, apunta que esta situación demostra "a necesidade de estar alerta sobre posibles brotes e repuntes", de forma que permitan unhas medidas de "resposta rápida, coordinada, controlada e que permita illar o máximo posible o aumento da incidencia".
Ademais, reclámalle ao Executivo autonómico que explique "se considera que o control da situación permite asegurar que o brote está illado e a súa suspensión baixo vixilancia". Para iso, sinala que "é imprescindible o nivel de información adecuado á poboación onde estes repuntes poden ser máis notorios".
Por todo iso, Torrado requírelle ao Goberno galego para que explique no Parlamento o nivel de información e de medidas de control e confinamento que están a ser transmitidas derivadas das viaxes de estudantes a Mallorca.
