Ás verdades da emigración
A campaña das municipais estase quentando, principalmente, na emigración. Tal e como xa fixemos coas denuncias urbanísticas, Galiciaconfidencial pídelle aos seus lectores que nos informen, ben a traveso do e-mail ou dos comentarios, das irregularidades que detecten na campaña ou na tramitación do voto emigrante. O noso obxectivo é denunciar aquelas prácticas que ridiculizan aos nosos emigrantes e conseguir, dunha vez, que sexan tratados como o que son, galegos coma os de aquí. Ata o momento podemos falarvos dos seguintes casos...
Por Galicia Confidencial | Galicia | 19/03/2007 | Actualizada ás 22:41
PPdeG e BNG teñen denunciado que a Fundación Españoles en el Mundo, vinculada ao PSOE, remitiu unha carta a emigrantes coruñeses en Bos Aires co logo do Concello da Coruña para que responderan a unha "enquisa censal xeral e obrigatoria" que realizaba a Alcaldía deste municipio.
Dende Arxentina tamén denuncian que a candidata do PPdeG de Vimianzo, Carmen Borbujo e os alcaldes de Viladecruces, Jesús Otero; de Bande, Ana Belén Vázquez ou o de Salceda, José Manuel Fernández, pediron copia do pasaporte en varios actos de partido que realizaron, como tamén fixo o PPdeG nun evento no que participou o presidente da Deputación de Pontevedra, Rafael Louzán, en Montevideo. Dende Uruguai tamén sinalan que o rexedor de Sada, Ramón Rodríguez Ares, fixeron o mesmo en Montevideo noutra comida.
Esta mesma fin de semana, o candidato do PPdeG á Alcaldía de Carballo, Alberto Sueiro, convidou a unha comida aos emigrantes deste concello no Centro Bergantiños de Montevideo e, segundo nos contan, mesmo trasladaron unha fotocopiadora a este acto (porque alí non había) para sacar copia dos pasaportes dos que alí asistían.
Tamén hai denuncias de que o alcalde de Catoira, Alberto García, do PSdeG, sorteou catro viaxes nunha comida para 200 persoas que celebrou en Bos Aires.
Asemade, hai críticas á Consellería de Cultura por ter beneficiado á Federación de Sociedades Galegas de Bos Aires que preside o coordinador do BNG na capital arxentina, Xosé Lores, en varias exposicións que ten organizado.
