Por E.P. | SANTIAGO DE COMPOSTELA | 06/07/2021 | Actualizada ás 19:38
O grupo municipal de Marea Atlántica remitiu ao resto de formacións da corporación do Concello da Coruña unha declaración institucional contra a 'LGTBIQfobia'.
A proposta de Marea chega tras o crime do mozo Samuel e tras os episodios vividos nos últimos días na área da cidade herculina, onde unha parella homosexual foi agradedida, un mural vandalizado con pinturas homófobas e unha bandeira arcoiris que ondeaba no centro da urbe foi arrincada e esnaquizada.
"Camiñamos cara á igualdade, pero a actualidade está a pór en evidencia o moito que aínda queda por camiñar e o fráxiles que poden ser as conquistas que non se defenden", remarca a Marea nun comunicado no que advirte da existencia de "discursos de odio" e de "desprezo á diversidade" en España e Europa que "están a atopar altofalantes".
Así as cousas, o texto proposto pola formación que gobernou A Coruña entre 2015 e 2019 condena a "brutal agresión" que acabou coa vida de Samuel Luiz e apela ao esclarecemento dos feitos que rodean a morte "e que as persoas responsables non queden impunes".
Ademais, tamén condena o ataque sufrido por Alex Docherty e Marcos Fernández, a parella agredida hai unha semana; e expresa "o compromiso coa igualdade real e coa non discriminación das persoas LGTBIQA+", así como a vontade de articular desde o ámbito municipal das medidas necesarias para que así sexa.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.