Por Galicia Confidencial | SANTIAGO DE COMPOSTELA | 15/07/2021 | Actualizada ás 22:30
Nova concentración da Confederación Intersindical Galega contra o acordo das pensións. A formación mobilizouse na mañá do pasado mércores con manifestacións nas sete cidades galegas en rexeitamento ao pacto da reforma das pensións subscrito polo Goberno español, os sindicatos estatais e as organizacións patronais. Segundo apuntan dende a formación, o pacto supoñerá un "empobrecemento xeneralizado" das contías percibidas no marco do sistema público.
Esta mobilización conxunta, que segue ao marco de protestas sostidas nos últimos meses, vén da man dun rexeitamento "tanto ás formas como o fondo" dun acordo que, di a CIG, "non reforza o sistema público e que mantén a ampliación da idade de xubilación e do período de cálculo, así como a supresión na práctica da modalidade de xubilación parcial". O secretario xeral, Paulo Carril, que participou na concentración da Coruña, denunciou que esta reforma non só resulta "insuficiente", senón que mesmo é "regresiva"; e apuntou a que mantén en vigor a "brutal reforma de 2011", que tamén contou co aval de CCOO e UGT.
A reforma de 2011, engaden dende a CIG, supuxo atrasar de maneira progresiva a idade de xubilación até os 67 anos e ampliar o período de cálculo das pensións, que pasou dos 15 aos 25 anos, limitando ademais o acceso á xubilación parcial. Con estas medidas o que se buscaba era provocar unha "importante caída nas contías das pensións", cifrada por Carril nun 25%.
"ESPECIALMENTE LESIVO" PARA GALICIA
A este respecto, o secretario xeral da CIG advertiu que a reforma pactada neste 2021 "afondará neste empobrecemento das prestacións", sendo especialmente lesiva para Galicia, que se sitúa como a Comunidade coas segundas pensións máis baixas de todo o Estado. "A pensión media galega está nos 878€, moi lonxe da pensión media do Estado, situada nos 1.032€, polo que con este acordo se está consolidado esta diferenza", advertiu. Ademais, fálase de ampliar o período de cálculo aos 35 anos "co cal as contías que van percibir as galegas e galegos serán áinda máis baixas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.