Sanidade e o Concello de Campo Lameiro colaborarán na reforma do centro de saúde
O investimento será confinanciado a partes iguais polo Sergas e o Concello deste municipio.
Por Europa Press / Redacción | PONTEVEDRA | 20/07/2021 | Actualizada ás 17:10
A Consellería de Sanidade e o Concello de Campo Lameiro asinaron este martes un acordo bilateral para colaborar na reforma do centro de saúde desta localidade, que contará cun investimento de 94.812 euros.
Así o informou Sanidade nun comunicado, no que explica que o titular desta Consellería, Julio García Comesaña, e o alcalde de Campo Lameiro, Carlos Costa Domínguez, subscribiron un acordo bilateral no que se establecen as bases para o financiamento das obras de reforma do centro de saúde desta localidade.
O investimento deste proxecto de mellora ascende a 94.812 euros, concreta Sanidade, partida económica que será cofinanciada a partes iguais polo Sergas e o Concello deste municipio.
Comesaña agradeceu a "boa disposición" do alcalde para poder asinar este convenio, con "tempo suficiente para que se poida licitar a obra e executarse en prazo". Así, o persoal e pacientes do centro de saúde de Campo Lameiro contarán a partir do ano que vén cunha infraestrutura "mellor e máis confortable", abunda Sanidade.
OBRAS
As obras, tras o informe dos técnicos do Sergas que visitaron o centro, consisten na renovación das cubertas e do soportal do edificio, así como a construción dun novo soportal cuberto no lateral dereito do edificio para o acceso dos pacientes desde a ambulancia.
Así mesmo, modificarase a rampla de acceso para cumprir cos requisitos legais de accesibilidade, detalla Sanidade, e crearase unha sala Covid, ademais de ampliarse e renovarse a porta da sala de Urxencias.
A actuación tamén inclúe a renovación da pintura interior, azulexos, instalación eléctrica e radiadores, ademais da substitución da carpintaría exterior por outra con rotura de ponte térmica e dobre cristal.
