Rueda, sobre o peche de sucursais bancarias no rural: "é unha situación xeneralizada"
Portas aprobará un manifesto contra o peche de sucursais nun pleno extraordinario o vindeiro martes.
Por Europa Press / Redacción | SANTIAGO DE COMPOSTELA | 27/08/2021 | Actualizada ás 18:28
O vicepresidente primeiro e conselleiro de Presidencia, Xustiza e Turismo, Alfonso Rueda, lamentou o peche de sucursais bancarias que se materializarán o próximo mes en diversos puntos do rural galego e asegurou que o Goberno autonómico tentará que a entidade "recapacite" para tentar que os pobos non queden "sen servizos" deste tipo.
Os gobernos locais de municipios como Campo Lameiro, Zas, Vimianzo e A Baña, entre outros, están inmersos en diversas accións reivindicativas para denunciar a situación na que quedarán os veciños ante a supresión destas oficinas por parte de Abanca, ao tratarse das únicas coas que contan para poder acceder de forma presencial a estes servizos.
Campo Lameiro, de feito, acolle este venres unha manifestación convocada polo Consistorio, á que acudirán representantes de todos os grupos. "Estaremos alí dicindo que non estamos de acordo", asegurou Rueda respecto diso. Neste sentido, lamentou que se trata de "unha situación xeneralizada", non só neste municipio, e que a Xunta tentou "buscar solucións paliativas, como a extensión de caixeiros", pero "o problema principal é que se retiren sucursais no rural". "Tentaremos que recapaciten e non se deixe aos pobos sen servizos bancarios", resolvo Rueda.
MANIFESTO EN PORTAS
Os portavoces municipais doutro municipio, neste caso Portas, decidiron convocar un pleno extraordinario para o vindeiro martes para oficializar a súa repulsa ao peche da única sucursal bancaria do municipio, no que se aprobará un manifesto reivindicativo e consensuado por todos os grupos con representación na corporación.
O texto enviarase á dirección de Abanca, á Xunta de Galicia, ao Goberno central e ao Banco de España como entidade reguladora da actividade bancaria.
PROTESTA NA CORUÑA
Ademais, Zas, Vimianzo e A Baña manifestaranse o 2 de setembro, sobre as 11,30 horas, ante a sede de Abanca na Coruña contra o peche destas sucursais nos seus municipios, para a que se habilitarán diversas liñas de autobús para apoiar a asistencia dos veciños.
"Imos esgotar todas as posibilidades que temos na nosa man para lograr que Abanca reconsidere esta decisión", trasladou o rexedor de Zas, Manuel Muíño.
