A Xunta só ten activos catro dos 18 reténs contratados para combater os lumes con maquinaria pesada
Dous deles son coa empresa Eulen, e os outros con Serfonor. A maior parte dos contratos comezaron a finais de abril e remataron a comezos de agosto, aínda que o presidente da Xunta recoñeceu que a tempada de incendios estase atrasando a setembro e outubro. Medio Rural aclara que hai traballando na zona 10 bulldozers.
- Feijóo sobre o lume de Ribas de Sil: "Hai que levar as lapas ata o río para que así o lume morra alí"
- Desactivada a alerta por proximidade ás casas pero aínda sen control os lumes en Ribas de Sil
Por Galicia Confidencial | Compostela | 07/09/2021 | Actualizada ás 22:00
O presidente da Xunta, Alberto Núñez Feijóo, recoñecía este martes que se está atrasando a campaña de incendios xa que os máis virulentos soen ter lugar nos meses de setembro e outubro, como o que está acontecendo en Ribas de Sil. Con todo, e a pesar de que Medio Rural xa traballa coa previsión de que cada vez os incendios teñen lugar máis alá do verán, a Xunta só ten activos cinco contratos, dos 18 que realizou durante este ano, para contratar maquinaria pesada coa que combater, precisamente, os lumes.
A Consellería do Medio rural destinou 2,26 millóns para a contratación de servizos de retén de maquinaria pesada para a extinción de incendios forestais nos distritos forestais de Galicia durante os anos 2021 e 2022. Deles xa gastou a metade, máis de 1,1 millóns en 18 contratos con distintas empresas do sector, pero, a maioría destes contratos finalizou, xa que comezaron a finais de abril, e o prazo do execución dos traballos era de 3 meses e dez días.
De feito, na actualidade só hai catro contratos que están activos nun momento de máxima actividade incendiaria e con alertas de secas nalgunhas zonas de Galicia, principalmente, nas zonas do interior do país. Dous destes contratos son con EULEN, a empresa da que é directiva a irmá de Feijóo, por 117.000 e 104.000 euros. Os outros dous restantes son para Serfonor Medioambiente Sociedad Limitada, por 106.000 e 121.000 euros.
Con todo, en declaracións de Medio Rural remitidos a este medio, este departamento aclara que "actualmente están activos 17 reténs para actuar contra o lume e só en Ribas de Sil traballaron ata 10 bulldozers".
| Lote | Part. | Resolución | Adxudicatario | Importe | Data difusión | Prazo de execución | |
|---|---|---|---|---|---|---|---|
| 01 | 7 | Adxudicado | SERVITEC MEDIO AMBIENTE, S.L. | 101.930,93 € | 23-04-2021 11:33:25 | 3 meses 10 días | |
| 02 | 6 | Adxudicado | SERVITEC MEDIO AMBIENTE, S.L. | 101.930,93 € | 23-04-2021 11:41:28 | 3 meses 10 días | |
| 03 | 6 | Adxudicado | RECAL 14 NATURA SL | 108.637,89 € | 23-04-2021 12:04:27 | 3 meses 10 días | |
| 04 | 8 | Adxudicado | MANTENIMIENTO FORESTAL M.G., S.L. | 104.885,51 € | 16-04-2021 09:43:02 | 3 meses 10 días | |
| 05 | 11 | Adxudicado | SERFONOR MEDIOAMBIENTE SOCIEDAD LIMITADA | 106.114,58 € | 08-07-2021 11:55:42 | 3 meses 10 días | |
| 06 | 11 |
Adxudicado DILIXENCIA |
DEFORGAL XXI, S.L | 102.123,08 € | 25-05-2021 11:04:47 | 3 meses 10 días | |
| 06 | 11 | Adxudicado | EULEN, S.A. | 117.433,40 € | 23-08-2021 10:51:42 | 3 meses 10 días | |
| 07 | 11 | Adxudicado | EXURGA, S.L. | 99.453,53 € | 25-05-2021 11:06:36 | 3 meses 10 días | |
| 08 | 12 | Adxudicado | MANTENIMIENTO FORESTAL M.G., S.L. | 96.923,78 € | 05-04-2021 11:57:10 | 3 meses 10 días | |
| 09 | 7 | Adxudicado | FORESTACION GALICIA, S.A. | 119.669,00 € | 05-04-2021 12:23:43 | 3 meses 10 días | |
| 10 | 6 | Adxudicado | OS ERBEDOS, S, COOP. LTDA. | 118.519,02 € | 23-04-2021 12:17:31 | 3 meses 10 días | |
| 11 | 6 | Adxudicado | SERFONOR MEDIOAMBIENTE SOCIEDAD LIMITADA | 121.617,10 € | 30-06-2021 09:37:22 | 3 meses 10 días | |
| 12 | 8 | Adxudicado | OS ERBEDOS, S, COOP. LTDA. | 120.118,15 € | 23-04-2021 12:27:16 | 3 meses 10 días | |
| 13 | 7 | Adxudicado | AUXILIAR DE SERVICIOS FORESTALES GALLEGOS, S.L. (ASERFOGA) | 122.427,80 € | 05-04-2021 13:01:58 | 3 meses 10 días | |
| 14 | 6 | Adxudicado | AUXILIAR DE SERVICIOS FORESTALES GALLEGOS, S.L. (ASERFOGA) | 120.842,70 € | 05-04-2021 13:28:09 | 3 meses 10 días | |
| 15 | 8 | Adxudicado | REPOBOACIONS E DESBROCES DO NOROESTE SL | 98.917,50 € | 16-04-2021 09:51:53 | 3 meses 10 días | |
| 16 | 5 | Adxudicado | FORESTACION GALICIA, S.A. | 99.549,12 € | 16-04-2021 09:56:04 | 3 meses 10 días | |
| 17 | 6 | Adxudicado | EULEN, S.A. | 104.965,08 € | 22-06-2021 13:26:57 | 3 meses 10 días | |
| 18 | 5 | Adxudicado | TRANSPORTES Y CANTERIA ANTONIO S L | 97.625,46 € | 16-04-2021 10:01:53 | 3 meses 10 días |
OBXECTIVOS
O obxecto desta contratación é o da prestación dun servizo de retén de maquinaria pesada de
extinción para a loita contra os incendios forestais. A execución do contrato inclúe a prestación dun servizo de extinción de incendios mediante maquinaria pesada. Segundo o prego do contrato, ao que tivo acceso GC, "para a prestación deste servizo, o adxudicatario disporá dun retén de maquinaria composto por tractor de cadeas, góndola de transporte e vehículo piloto".
A prestación do servizo levarase a cabo durante 40 días de dispoñibilidade durante o ano 2021 e 50 días de dispoñibilidade no ano 2022. O orzamento do contrato inclúe unha bolsa de horas de extinción e quilómetros de desprazamento do retén. A dispoñibilidade do retén será de 24 horas ao día, das cales 10 horas serán de presenza física do persoal en estado de retén e as outras 14 horas serán de dispoñibilidade, debendo permanecer localizado por teléfono e emisora a menos de 30 minutos do lugar de espera establecido para o retén de maquinaria.
O horario de presenza establecerase, de maneira xeral nos períodos de máximo risco, segundo o indicado polo CCP (Centro de Coordinación Provincial), podéndose variar por necesidades puntuais. O CCP determinará tamén o lugar no que deberá permanecer o retén de maquinaria completo (tractor de cadeas, góndola e vehículo piloto), cargado o tractor sobre a góndola e listo para saír.
ACTUACIÓN EN GALICIA E PORTUGAL
Tras a sinatura deste contrato, as empresas deberán contar con persoal suficiente para a realización de quendas de traballo sen que se supere a xornada establecida legalmente para cada traballador. O CCP debe ter sempre a posibilidade de contactar directamente co persoal asignado. Dentro dos períodos de dispoñibilidade, cando se de aviso de saída do retén de maquinaria para participar na extinción dun lume, este deberase poñer en marcha de forma inmediata cando se encontre dentro das horas de presenza física. Fora do horario de presenza, o persoal deberá desprazarse ao punto de reunión establecido nun prazo inferior a 30 minutos.
O ámbito territorial de actuación dos traballos de retén de maquinaria pesada contra incendios
forestais comprende toda Galicia, aínda que tamén se poderá actuar en zonas limítrofes das comunidades autónomas coas que exista convenio ou na zona fronteiriza con Portugal.
