A Deputación de Ourense promove a formación de profesionais de termalismo cun curso en técnicas de benestar

A Deputación de Ourense presentou este xoves o terceiro curso de especialización en técnicas de benestar para profesionais do termalismo, un programa formativo impartido polo centro Lito Seoane e o Grupo Caldaria. O curso é gratuíto e terá unha duración de dous meses, tempo durante o que dez alumnos se formarán nos ámbitos de hidrotermalismo e de balneoterapia. Está dirixido a estudantes con coñecementos en estética e coidados persoais, titulados en enfermaría e no coidado de maiores ou profesionais que desexen especializarse.

A duración da formación é de 120 horas repartidas en oito módulos co obxectivo de formar en técnicas hidrotermais e balneoterapia, obter habilidades de comunicación para unha mellor atención ao cliente e coñecer os criterios necesarios de hixiene e de calidade para desenvolver mellor o traballo.

A deputada de Política Social, Luz Doporto, destacou que é "unha mostra decidida" da institución por "o termalismo, a xoia da coroa do turismo de benestar" do que Ourense "ofrece servizos de alta calidade". Ademais lembrou que ao tratarse da terceira edición do curso, "nas anteriores formáronse máis de 30 persoas para dar resposta á demanda da sociedade".

Pola súa banda, o director de Lito Seoane, José Luís Sánchez, agradeceu o apoio da Deputación de Ourense e enxalzou o traballo da institución no desenvolvemento do termalismo celebrando a iniciativa de converter o Pazo Provincial "no Gran Hotel Balneario de Ourense".

Así mesmo, Sánchez agradeceu a colaboración do Grupo Caldaria por facilitar as prácticas aos alumnos, "un valor engadido cunha empresa líder que non poden ofrecer outras iniciativas formativas". Asegura, ademais, que "a inserción laboral achégase ao 25%".

A directora médica de Caldaria, María Dores Fernández, trasladou, pola súa banda, o "elevado nivel de esixencia tanto teórica como práctica do curso" porque "se necesitan profesionais formados tanto para os traballos en balnearios como noutro tipo de instalacións dependendo do tipo de auga e das técnicas a empregar". O curso comezará o 4 de outubro e terminará o 2 de decembro. Desde hoxe poden realizarse as inscricións a través da web da Deputación de Ourense, de Lito Centro e de Caldaria.