Feijóo ve "normal" que Ayuso queira presidir o PP de Madrid: "non hai enfrontamento"

O presidente da Xunta e líder do PP galego, Alberto Núñez Feijóo, asegurou que lle parece "normal" que a presidenta de Madrid, Isabel Díaz Ayuso, queira presidir o partido na súa comunidade, e asegurou que non ve "enfrontamento" co alcalde madrileño, José Luís Martínez-Almeida.

Preguntado respecto diso nunha rolda de prensa posterior á súa reunión coa vicepresidenta segunda do Goberno, Yolanda Díaz, o dirixente galego asegurou que ve "normal" que Ayuso queira optar a liderar o PP de Madrid. De feito, engadiu que lle "sorprendería" que "fose o contrario".

Feijóo defendeu que nos "partidos democráticos" estas cuestións debátense nos congresos e insistiu en que non ve "enfrontamento", antes de engadir que el coñece "perfectamente" ao alcalde de Madrid e sabe que "tampouco o ve" como tal. En todo caso, dixo que este tipo de cuestións preocúpanlle "máis ben nada" e que está pendente dos congresos provinciais galegos, que se celebran agora. "Ao resto non lle vexo debate nin percorrido. Seguro que se resolverá con normalidade e acerto", aseverou.

Ante a insistencia dos medios e tras ser preguntado acerca de se considera que Ayuso debería presidir o PP de Madrid, precisou que el non dixera " iso" senón que lle parece "normal" que un presidente autonómico "queira presidir o partido na súa comunidade". "Polo menos eu tenteino", resolveu, finalmente, en ton de broma.

O presidente da Xunta, Alberto Núñez Feijóo, e a vicepresidenta segunda do Goberno e ministra de Traballo, Yolanda Díaz, á súa chegada unha reunión entre ambos, a 17 de setembro de 2021, en Santiago de Compostela.. Álvaro Ballesteros - Europa Press | Fonte: Europa Press