O presidente do PP de Pontevedra cualifica de "capricho" o coche oficial para o alcalde valorado en 60.000 euros
Rafa Domínguez sinala que o alcalde de Pontevedra, Fernández Lores, ten "un gusto polo luxo que pouco ten que ver cos principios que di defender. É comunismo de caviar".
Por E.P. | SANTIAGO DE COMPOSTELA | 22/09/2021 | Actualizada ás 18:33
O presidente do PP de Pontevedra, Rafael Domínguez, tachou de "capricho" a adquisición por parte do alcalde da cidade, Miguel Anxo Fernández Lores, dun coche oficial valorado en máis de 60.000 euros.
Nun comunicado, Domínguez, "que pediu paralizar a operación o pasado mes de maio", criticou que Lores "sempre defendeu que a Corporación municipal utilice o transporte público ou os vehículospropios dos concelleiros nos seus desprazamentos laborais", ao que engadiu que, ademais, "é dabondo coñecido que o noso alcalde pouco ou nada se move".
"Foi un capricho do señor Lores, que ten un gusto polo luxo que pouco ten que ver cos principios que di defender. É comunismo de caviar", aseverou o presidente dos populares pontevedreses.
"Cando solicitamos numerosos plans para paliar o duro golpe que a pandemia produciu en Pontevedra, o BNG e o PSOE votaron en contra. Nin unha soa axuda directa aos sectores máis afectados, ás familias da nosa cidade, pero en cambio hai diñeiro para un novo coche de altísima gama para o alcalde. Ademais, non renuncia nin ao chofer nin á praza de garaxe que lle pagamos todos en pleno centro da cidade", declarou o popular.
Neste sentido, Domínguez cargou contra a "hipocrisía" de Lores, "que na mesma semana di que os coches necesarios na cidade son moi poucos e cómprase co diñeiro de todos o pontevedreses un que alcanza o 100 km/h en pouco máis de cinco segundos e supera o 260 km/h".
