A nova estratexia RIS3 de Galicia xa ten configurado o grupo de expertos que a deseñarán
O vicepresidente económico e conselleiro de Economía, Empresa e Innovación, Francisco Conde, sinala que o obxectivo principal deste grupo é debater, complementar as conclusións provisionais nos grupos de traballo.
Por E.P. | SANTIAGO DE COMPOSTELA | 05/10/2021 | Actualizada ás 17:10
O vicepresidente económico e conselleiro de Economía, Empresa e Innovación, Francisco Conde, participou este martes na Cidade da Cultura na reunión do grupo de expertos creado para axudar no deseño da Estratexia de especialización intelixente RIS3 de Galicia par o período 2021-2027.
No acto, do que informou a Xunta nun comunicado, Conde apostou pola participación de todos os axentes do ecosistema galego de I+D+i para configurar a que será a folla de ruta da innovación en Galicia.
O obxectivo principal deste grupo, conforme indicou o Goberno galego, é debater, complementar as conclusións provisionais que saian nas distintas mesas de traballo, recoller as melloras e recomendacións e achegar unha visión independente e externa ao propio proceso de definición desta estratexia.
Deste xeito, o vicepresidente económico asegurou que a nova estratexia é unha oportunidade para abordar a Galicia do 2030 a través dun modelo intensivo en coñecemento, sustentable e pensado por e para as persoas, ao mesmo tempo que sinalou que o éxito desta iniciativa estará marcado pola súa capacidade para desenvolver o binomio sustentabilidade-industria para garantir a competitividade do tecido empresarial (xeración de pegada industrial) e o benestar das familias.
O vicepresidente económico fixo referencia á boa acollida que tivo a anterior RIS3 2014-2020, coa que se concederon máis de 6.700 axuda para impulsar a innovación, mobilización 1.900 millóns de euros en investimentos grazas á colaboración público-privada.
Segundo indicou, exemplo deste éxito son as cifras alcanzadas no 2019 en Galicia, sendo as máis altas de toda a serie estatística tanto en investimento en I+D+i --máis de 627 millóns--, como en número de persoas que traballan na actividade --10.085--, logrando ser unha do oito comunidades que superaron os niveis deste ámbito previos á crise de 2009.
Así, Conde manifestou que a colaboración público-privada seguirá sendo clave nesta nova etapa da estratexia, polo que sinalou a necesidade de involucrar ao maior número posible de empresas. Neste contexto, asegurou que a RIS3 consolidará un modelo propio de ecosistema de innovación co que afrontar a transición ecolóxica e dixital, polo que indicou que a Xunta --que duplicou o investimento neste campo-- seguirá apostando polo diálogo e o consenso.
