Manifestación de traballadores de Aludec en Pontevedra para reclamar "salarios xustos e condicións dignas"

Os traballadores da empresa Aludec manifestáronse este xoves polas rúas de Pontevedra para reclamar "salarios xustos e condicións laborais dignas".

Esta mobilización pecha o tres xornadas de folga, convocadas pola CIG, que se desenvolveron os días 8, 15 e 17 de xullo para reclamar convenios colectivos dignos nos distintos centros de traballo.

Ademais, coincidindo con cada reunión de convenio, están a concentrarse diante da empresa "para mostrarlles que a situación laboral e salarial nos grupos profesionais inferiores é de total precariedade e son discriminatorios".

Así o expresaron este xoves nun comunicado ao que se deu lectura ao concluír a manifestación na Praza da Peregrina.

Aludec é unha empresa líder na fabricación de elementos decorativos para o automóbil en Europa "e con cifras marca de vendas". Conta con centros produtivos en Portugal, México, Estados Unidos e en Pontevedra, concretamente nos polígonos do Campiño e A Reigosa.

Con todo, os traballadores denuncian que a situación salarial da Aludec sitúaa como "a segunda que menos abona no noso convenio ás persoas traballadoras de todo o sector da automoción no noso país". Cualifican de "alarmante" a situación de "precariedade laboral".

Segundo os representantes dos traballadores, ao redor de 300 das 900 persoas que integran o persoal de Aludec son contratadas a través de Empresas de Traballo Temporal (ETT). Así mesmo, afirman que o 65% do persoal cotiza no grupo profesional 10 de cotización á Seguridade Social: "É dicir, somos peóns".

"Como pode ser que existan categorías que se abonen salarios diferentes facendo o mesmo traballo nas diferentes plantas?", preguntan.

Tamén critican que non existe un claro protocolo de promoción para poder optar a postos diferentes, nin un plan de formación, nin un sistema de rotación de postos para evitar lesións.

"Non nos queren recoñecer o valor de noso traballo pero nós queremos darlle ese valor, porque é de xustiza", defenderon no seu comunicado.

Manifestación dos traballadores de Aludec en Pontevedra.. CIG | Fonte: Europa Press