O suposto uso de marisco ilegal volve poñer o programa de MasterChef na Coruña no foco da polémica

A polémica rodeou o programa de MasterChef na cidade da Coruña desde o primeiro momento. Logo de que as críticas correran como a pólvora a conta da imitación do acento galego nun pequeno sketch que non gustou a todo o mundo, o foco volve situarse neste programa de cociña debido á presunta utilización de marisco ilegal durante a elaboración das receitas que o xurado encomendou ás celebrities participantes.

Foi o mariñeiro Rogelio Santos Queiruga quen alertou sobre este asunto. Nas imaxes emitidas en prime time da TVE obsérvase como algúns dos produtos que empregan - en concreto, dous exemplares de lumbrigante - teñen ovas e, polo tanto, están en fase de cría. A normativa existente prohibe a pesca e o consumo deste tipo de especies, e é por iso que a Xunta de Galicia anunciou a apertura dunha investigación para aclarar o uso de marisco ilegal nas súas receitas. 

Segundo informa Eldiario.es, o Goberno galego iniciou as xestións pertinentes e asegura que tomará as medidas oportunas segundo os resultados. 

Eu non son cherif, policía nin xuiz, pero o que si son é mariñeiro responsable, e como tal, gustaríame saber se os lumbrigantes do @MasterChef_es grabado en Galicia recentemente era marisco galego e se efectivamente estaba con ova, e de ser así, se lles parece bonito. pic.twitter.com/TgYr0YGBEF

— Rogelio Santos Queiruga (@QueirugaRogelio) October 6, 2021