Galicia celebra este venres o Día das Bibliotecas

A celebración do Día das Bibliotecas este 24 de outubro contará en Galicia cunha programación na que haberá música, contacontos, teatro, talleres e rutas guiadas. A presentación da programación deseñada pola Xunta para a rede de bibliotecas autonómicas tivo lugar este martes nunha rolda de prensa na que participou o secretario xeral de Cultura, Anxo Lorenzo, xunto aos responsables de bibliotecas da Coruña, Santiago, Vigo e Ourense.

Os actos programados para o Día das Bibliotecas arrincará este venres na Cidade da Cultura coa inauguración dunha exposición que conmemora o dez anos da creación da Biblioteca de Galicia.A mostra poderá visitarse ata o 31 de maio de 2022 na biblioteca do Gaiás, que reúne máis de 70 pezas das coleccións que custodia este centro, con algúns dos documentos máis antigos.

Lorenzo agradeceu a implicación das persoas que cederon as súas coleccións á Biblioteca de Galicia durante a última década, unha achega que contribuíu "a enriquecer os fondos dunha maneira que sería imposible conseguir con medios propios".

Así, as bibliotecas autonómicas nas cidades acollerán unha serie de actividades durante esta fin de semana para as que será preciso inscribirse ou retirar invitacións nas páxinas web dos centros.

A Coruña celebrará o venres unha xornada de portas abertas con visitas guiadas, así como un itinerario de autor ao redor da historia da cultura da cidade herculina que correrá a cargo da historiador da arte Felipe Senén.

En Lugo, Caramuxo Teatro ofrecerá un espectáculo de contacontos durante a tarde do venres orientado especialmente a bebés e familias; mentres que a biblioteca de Ourense celebrará ese mesmo día un concerto de Pablo Díaz.

A biblioteca Ánxel Casal de Santiago arrincará as actividades cun taller sobre novas fórmulas de contidos en Internet e a Juan Campanel de Vigo adiántase ao resto co espectáculo de narración oral 'Historias non mar' a cargo de Olga Abad.