A Xunta pretende crear 37 centros de saúde segundo o seu novo plan de infraestruturas do Sergas
Ademais diso, iniciará obras de reformas noutros catorce centros.
Por Europa Press / Redacción | Santiago de Compostela | 29/10/2021 | Actualizada ás 14:54
O Goberno galego aprobou este venres o novo plan de infraestruturas de Atención Primaria do Servizo Galego de Saúde (Sergas), que permitirá crear 37 novos centros de saúde e reformar outros 14. En total, actuarase en instalacións que atenden a 650.000 cidadáns, sobre "o 25 por cento da poboación".
"Un de cada catro galegos terá un novo centro de saúde ou centros de saúde reformados", afirmou o presidente da Xunta, Alberto Núñez Feijóo.
O plan de infraestruturas de Atención Primaria buscará "dar un paso adiante" para "finalizar o novo mapa de centros de saúde de Galicia" cun total de 51 actuacións que estarán priorizadas --dixo o mandatario autonómico-- por criterios "técnicos e asistenciais" como a antigüidade das instalacións, o seu estado de conservación e as carencias operativas que mostren.
As distintas obras que contempla esta folla de ruta disporanse en tres fases distintas. Na chamada 'fase 0' figuran 10 actuacións cuxa tramitación xa arrincou: nove centros novos --Abegondo, Santa Lucía na Coruña, Antas de Ulla, A Rúa, Moaña, Soutomaior, Vilagarcía e os centros integrais de saúde (CIS) de Ourense e Vigo-- e a reforma dun centro de saúde --o de Conxo, en Santiago--.
