Galicia administrará desde mediados de novembro a dose extra de Janssen

O presidente da Xunta, Alberto Núñez Feijóo, ratificou este venres que o Servizo Galego de Saúde (Sergas) administrará desde "mediados de novembro", tal e como se aprobou esta semana na Comisión de Saúde Pública, a segunda dose da vacina de Janssen contra a covid-19 aos máis de 122.000 galegos que a recibiron nos últimos meses.

Así o avanzou este venres na rolda de prensa posterior á reunión do seu Goberno, na que confirmou que "tamén a mediados de mes" Galicia arrincará coa terceira dose de Pfizer ao grupo de 70 a 79 anos.

E é que ao longo desta semana, tal e como asegurou Feijóo, finalizouse xa a inoculación da dose extra nas residencias de maiores, á vez que arrincou esta campaña de reforzo para os maiores de 80 anos, aos que tamén se lles ofrece a vacina contra a gripe, en centros sanitarios de cabeceira.

De feito, segundo datos que ofreceu o presidente galego na súa comparecencia, o 97% dos maiores de 80 "están a acudir" a esta cita --máis de 40.700 ata o momento--, mentres que o 99% destes acceden a recibir tamén a da gripe.

O presidente da Xunta destacou que Galicia é, "xunto a Estremadura", a comunidade líder en vacinación cunha dose, mentres que se se ten en conta a administración da pauta completa, é "a primeira". En concreto, ata a xornada do xoves, hai 2.292.633 galegos co proceso finalizado --o 84,91% do total de habitantes e o 93,4% da poboación diana--.

Ademais, Feijóo lembrou que calquera persoa que queira vacinarse en Galicia na actualidade "non ten que pedir cita previa", senón simplemente acudir a "un dos 14 puntos" dispersados polas sete áreas sanitarias.