Nova rifa no pleno de Ourense entre PSOE e os de Jácome

O pleno extraordinario do Concello de Ourense aprobou por unanimidade a modificación de 12 millóns de euros para gastos prometidos a entidades e asociacións, así como para reactivar o tecido económico local. Con todo, a sesión saldouse tamén con rifa entre PSOE e Democracia Ourensana (DO) polo cesamento dos asesores e a ruptura "do pacto entre cabaleiros".

A edil de facenda e contratación explicou que o motivo de presentar a modificación en lote é que as partidas xa tiñan o consenso dos distintos partidos. Non houbo críticas respecto diso, todos votaron a prol e aprobouse a modificación, polo que está previsto que as axudas se reciban este mesmo ano decidindo se serán directas obonos de compra. "Chegan tarde, pero mellor tarde a que non cheguen", destacou Luís Seara do BNG.

A pesar de que houbo unanimidade en canto ao único punto da orde do día do pleno extraordinario, a sesión non estivo exenta de polémica.

Esta mesma semana o rexedor municipal, Gonzalo Pérez Jácome, anunciaba o cesamento de todo o persoal eventual da oposición, unha oposición que o achaca á "intención de compensar as asignacións económicas" que non votaron favorablemente no pleno municipal.

Con esa idea, Rafa Villarino, o portavoz socialista, criticou que no pleno non estaban todos porque faltaban os traballadores dos grupos políticos da oposición, algo que achacou a que "o señor Alcalde ingresará uns 280.000 euros ao ano". "60.000 polo seu soldo como alcalde, preto de 67.000 polas asignacións económicas por edil e ademais o imposto revolucionario que impón malgastando fondos públicos na súa televisión", detallou.

A resposta de Jácome foi que chamou a un traballador eventual do PSOE por "unha cuestión de cortesía", explicándolle que ían proceder ao seu cesamento e que "os culpables" eran "os seus xefes, o PSOE".

"Paréceme inaudito o que fixo o partido. Estaban de acordo hai uns meses con protexernos ante o transfuguismo, montamos o expediente con todo o traballo, dinme que traia informes favorables e que votarán a favor; témolos e para que DO perda diñeiro votan en contra. Só por amolar, é inaudito", remarcou o alcalde.

Por iso insistiu en que "o pacto de cabaleiros está roto" e que el "non" ten que "continuar facendo algo no que non cre".

Así mesmo indicou que o "imposto revolucionario" non é tal, expondo que "hai un ano e pico" na Coruña "sacaron unhas regras do que tiñan que pagar os eventuais de forma obrigatoria ao partido", algo que "é completamente normal e que aquí, que non é obrigatorio, critican", relatou.

"Uns asesores dan doazóns e outros non, depende das circunstancias de cada un e das competencias que teñan", explicou Jácome.

Con todo, o partido afectado por non aceptarse a compensación das asignacións económicas foi Ciudadanos e así o fixo saber o portavoz, José Araujo, que apuntou ao seu partido como "un dano colateral e unha vítima".

"Non só perdemos a asignación económica dun caso de transfuguismo, senón que, porque o PSOE incumpre un acordo, césasenos a un persoal eventual", lamentou.

Por iso advertiu que, a partir deste momento, vai "por libre". "Non me veñan con consensos para outras cousas, vou funcionar así", resolveu.