Cancelado o proceso para obter a certificación internacional sustentable para Mexillón de Galicia e culpan a WWF
Así o anuncia a través dun comunicado, no que acusa desta decisión á oposición de "determinados colectivos", con World Wildlife Foundation (WWF) á cabeza, por "estar empeñados desde o inicio deste camiño en dificultar un procedemento de seu xa moi esixente".
Por E.P. | SANTIAGO DE COMPOSTELA | 15/11/2021 | Actualizada ás 20:20
O Consello Regulador da Denominación de Orixe Protexida (DOP) Mexillón de Galicia decidiu cancelar o proceso de avaliación ao que estaba a ser sometido desde novembro de 2019 para obter a certificación internacional de sustentabilidade, de acordo co estándar Marine Stewardship Council (MSC).
Así o anuncia a través dun comunicado, no que acusa desta decisión á oposición de "determinados colectivos", con World Wildlife Foundation (WWF) á cabeza, por "estar empeñados desde o inicio deste camiño en dificultar un procedemento de seu xa moi esixente".
Estas actitudes terminaron por "colmar a paciencia" do Consello Regulador de Mexillón de Galicia, que "ata agora optara por un prudente silencio para non xerar distorsiones e evitar distraer a atención do obxectivo final".
Durante o procedemento, WWF presentou diversas alegacións ao outorgamento deste certificado e MSC admitiu varias delas, de modo que instou a Mexillón de Galicia a acometer melloras no relativo a especies secundarias capturadas incidentalmente, a estratexias de xestión e información para minimizar o impacto no ecosistema e ao cumprimento da lexislación, entre outros.
Nesta fase, que o Consello Regulador --afirma-- tomou dunha forma "dialogante", Wirld Wildlife Foundation tivo unha actitude "cada vez máis belixerante, recorrendo a manobras encamiñadas a propiciar un enfrontamento" entre as partes interesadas e a "buscar o desgaste do adversario".
Agora que a DOP Mexillón de Galicia xa decidiu dar marcha atrás neste procedemento, insta a World Wildlife Foundation a "asumir" as "consecuencias" desta actitude e a "reflexionar sobre o dano que a súa forma de proceder causará aos miles de familias que viven do mexillón en Galicia".
"E igualmente debería xustificar as razóns que lle levaron en España a manter unha postura tan belixerante para co mexillón galego, mentres que outras filiais de WWF tiveron unha actitude máis construtiva e dialogante con cultivos similares de mexillón desenvolvidos en países como Gran Bretaña ou Irlanda, entre outros", afea o Consello Regulador.
Ademais, pide a esta entidade que "xustifique as razóns" de alentar "á confrontación entre sectores para tentar situarse como actor protagonista da xestión do mar en Galicia", un labor que "xa a exercitan os organismos legalmente habilitados" para esa función. "Mexillón de Galicia négase a entrar nese xogo perverso de WWF dirixido unicamente a dividir. Por iso tomamos esta decisión", finaliza o comunicado.
