Un xornalista afgán refuxiado en Galicia pide ás potencias non recoñecer un réxime "terrorista"

Un xornalista afgán refuxiado en Galicia, Mohammad Ali Hoseini, vén de denunciar hoxe no Almorzo On/Off organizado no Liceo de Ourense polo Colexio Profesional de Xornalistas de Galicia o carácter "terrorista e extremista" do réxime taliban. Por iso, chamou a que as distintas potencias non recoñezan o seu goberno. "Moitos xornalistas afgáns, antigos soldados do goberno e activistas da sociedade civil están hoxe en risco", asegurou.

Tras pedir un minuto de silencio pola xente do seu país "que está vivindo o terror e a pobreza", o xornalista afgán Mohammad Ali Hoseini relatou o seu particular periplo, dende o seu nacemento no exilio iraniano até o regreso en 2002 a un Afganistán golpeado pola guerra, onde "estabamos combatendo a corrupción do goberno e o terrorismo", pero onde tamén "queriamos estudar para construír o futuro do noso país".

Hoseini exemplificou todas as esperanzas truncadas pola violencia. Explosións e ataques suicidas nos úlitmos anos a manifestacións, mezquitas, estadios, centros de ensino ou mesmo maternidades, incluída a que representou, nas súas palabras, "o pior día da miña vida": tres explosións producidas na sede da axencia Ava Press o 28 de decembro de 2017, onde 51 persoas morreron e máis de 90 foron feridas. "Ese día perdín moitos dos meus compañeiros e amigos, e se tivese estado na oficina non estaría hoxe aquí", afirmou. 

O xornalista refuxiado fixo entón un chamamento aos gobernos para que non recoñezan o réxime talibán: "son un grupo terrorista e extremista que non acepta o dereito internacional".  Neste sentido, lembrou casos como os dos reporteiros Taghi Daryabi, arrestado e golpeado por cubrir unha protesta feminina; Ali Reza Sharifi, atacado cando se dirixía á súa casa; ou Hamid Sighani, asasinado cunha bomba lapa, asi como outros xornalistas e activistas sociais, nunha situación especialmente dura para as mulleres.

Asimesmo, reivindicou o papel das e dos comunicadores para dar a coñecer a realidade do seu país: "Creo que un reporteiro é sempre un reporteiro, estea onde estea. Eu quero seguir adiante, e ser a voz do meu pobo".