Pontevedra tentará un ano máis que ningún neno en risco de exclusión social quede sen agasallo de Nadal

Unha nova edición da campaña (en)Volve tentará en Pontevedra que "ningún neno, nena ou adolescente de Pontevedra en situación ou risco de exclusión social quede sen o seu agasallo de Nadal". Trátase dunha iniciativa posta en marcha pola Concellería de Benestar Social en colaboración coa Fundación Meniños.

Nesta nova edición, como na anterior, explicou o concelleiro Marcos Rey que debido á situación sanitaria só se enviarán cartas vía whatsapp para evitar o contacto presencial coas familias ata o momento da entrega dos agasallos. Ademais, a campaña comeza con antelación para facilitar que sexa "segura para tódalas persoas implicadas".

Segundo destacou Marcos Rey, para participar na iniciativa é preciso escoller un agasallo entre os tres que figuran na carta e que non deberá superar en ningún caso os 40 euros. Unha vez mercado o agasallo haberá que remitilo á Casa Azul nun prazo máximo de dúas semanas trala recepción da carta, traendo o número da carta xunto co agasallo e o tícket (por se estivera defectouso e houbera que cambialo). Dende o Concello de Pontevedra animan a mercar os agasallos no comercio local.