Santalices reivindica a "plena vixencia" de órganos como o Consello de Contas
O presidente do Parlamento participou nun acto sobre os Órganos de Control en Santiago de Compostela.
Por E.P. | SANTIAGO DE COMPOSTELA | 02/12/2021 | Actualizada ás 18:30
O presidente do Parlamento de Galicia, Miguel Ángel Santalices Vieira, inaugurou este xoves os XIX Encontros Técnicos dos Órganos de Control Externo Autonómicos-OCEX 2021, onde reivindicou a "plena vixencia" destas institucións que en Galicia, que no caso do Consello de Contas, teñen rango estatutario.
O acto tivo lugar en Santiago de Compostela, no Pazo de Fonseca, onde Santalices lembrou que o próximo 19 de decembro se conmemora o 40 aniversario da Cámara galega, "nunha época caracterizada pola precariedade de medios". "Aínda así, Galicia foi capaz de edificar as súas propias institucións de autogoberno, sólidas, plenamente aceptadas pola sociedade e tamén plenamente leais ao marco de convivencia establecido pola Carta Magna".
O presidente do Parlamento recalcou que "lonxe da tentación abolicionista que avogaba por suprimir os órganos de control externo autonómicos", Galicia seguiu "o seu propio modelo; o de facer máis con menos". Isto traduciuse, indicou, nunha reforma lexislativa que en 2015 reforzou as competencias e independencia do Consello de Contas, "mentres que lle outorgou competencias en materia de prevención da corrupción no ámbito do sector público autonómico".
