Detectores covid e cosméticos antivirais, entre os proxectos innovadores que recibirán apoio da Xunta
Sanidade leva emitidos máis de 2,8 millóns de certificados covid, dos que máis de 2,7 millóns son de vacinación.
Por E.P. | SANTIAGO DE COMPOSTELA | 18/12/2021 | Actualizada ás 17:53
Sistemas de desinfección intelixentes, cosméticos con antivirais e novas formas de detectar e tratar o coronavirus coáronse entre os nove proxectos de investigación e innovación que captarán fondos da Xunta no marco do programa de axudas 'Conecta Covid'. Trátase dunha convocatoria á que o Goberno galego, segundo informa, destina un investimento total de 4 millóns de euros, coa previsión de mobilizar 4,9 millóns grazas á colaboración público-privada.
Entre os proxectos subvencionados están 'COVILED', un sistema de desinfección intelixente para controlar a propagación aérea da covid-19; e 'CO3', unha iniciativa que pretende, a través dunha mestura de ingredientes naturais, desenvolver produtos cosméticos de mans e cara con capacidade antiviral.
De igual modo, 'PROTEX' consistirá nun sistema de dixitalización do proceso para obter coberturas stenibles baseadas en micro ou nanofibras de celulosa que terán funcionalidades antimicrobianas, antivirais e hidrofóbicas, co obxectivo de aplicalas en tecidos de protección e sanitarios.
En canto á detección e tratamento do coronavirus, recibirán apoio económico da Xunta 'COPERIA' --unha plataforma de intelixencia artificial en apoio a pacientes afectados pola covid persistente--, 'BioTICfinder' --solucións diagnósticas e terapéuticas de segunda xeración'-- e 'NANOFLUIDETECT' --enfocado á detección rápida da enfermidade baseada en PCR, nanotecnoloxía e microfluidica--.
Así mesmo, 'DIXITAL-BIOCoV' estará orientado á predición temperá de actividade anti covid-19 sobre biomoléculas presentes en fungos e microalgas; e 'NANODCOV' buscará desenvolver nanoterapias para previr e tratar o coronavirus.
En todos estes nove proxectos seleccionados están implicadas 29 entidades galegas, incluídas as tres universidades --Vigo, A Coruña e Santiago de Compostela--, e todos están orientados ao mercado e á mellora da competitividade das empresas da Comunidade.
Ademais, a Xunta destaca que están aliñados cos obxectivos dos 'hubs' galegos de innovación dixital, 'Dihgigal' e 'Datalife', ambos os axentes colaboradores na convocatoria e desenvolvemento do programa de axudas que fomenta tamén a Estratexia de Especialización Intelixente (RIS3) de Galicia.
A intensidade da axuda que recibirán os proxectos apoiados depende da liña e do tamaño das empresas implicadas, xa que poden percibir ata o 80 por cento do total do investimento. De feito, poderán realizarse pagos anticipados de ata o 80 por cento da axuda concedida e mesmo da totalidade, no caso de que as iniciativas finalicen este ano ou en 2022.
MÁIS DE 2,8 PASAPORTES COVID EXPEDIDOS
Por outra banda, a Consellería de Sanidade emitiu xa un total de 2.852.022 pasaportes covid, segundo destaca este sábado a Xunta. De todos eles, 2.747.767 foron de vacinación, 71.463 de resultado de proba diagnóstica e outros 32.792 de superar a enfermidade.
Neste contexto, ata o día de hoxe, as oficinas de farmacia rexistraron os resultados de probas dun total de 70.735 persoas, que permitiron localizar 967 casos de covid-19.
Así mesmo, o sete áreas sanitarias realizaron test de antíxenos gratuítos en puntos situados nos distintos distritos. Unha vez pechados estes puntos, o balance final indica que se efectuaron probas a 27.816 persoas que permitiron detectar 311 positivos.
