Máis de 10.000 persoas comunicaron en Galicia positivo en covid-19 despois de facerse un autotest

Máis de 10.000 persoas comunicaron ata a mañá deste martes ao Servizo Galego de Saúde (Sergas) o seu positivo en covid-19 de forma telefónica tras facerse un autotest. Diso informou este martes o coselleiro de Sandiade, Julio García Comesaña, que sinalou que esta é unha das accións postas en marcha pola Consellería de Sanidade para aliviar a presión na atención primaria.

Comesaña sinalou que esta "autodeclaración" de tests positivos "directamente" a través do teléfono "sen necesidade de ir ao centro de saúde" xunto coa "eliminación de PCR agás a pacientes sintomáticos" son medidas que permiten unha "diminución da carga administrativa que están a sufrir os centros de atención primaria".

"Son 10.000 PCR menos feitas e, por tanto, máis PCR feitas para outros pacientes sintomáticos por exemplo", destacou o titular de Sanidade, que tamén dixo que son "10.000 visitas aos centros de saúde menos para facer esta declaración".

O conselleiro apuntou que, "cando alguén dea positivo", o mellor que pode facer é "chamar a este teléfono" e "non ir ao centro de saúde, á PAC ou as urxencias". Unha vez comunicado o positivo, Comesaña dixo que se contactará co paciente para facer "a enquisa correspondente sobre os contactos" e "facilitar, se fose o caso, o acceso á incapacidade temporal".

Preguntado sobre se leva a cabo algún tipo de comprobación para confirmar que se trata de casos positivos, Comesaña incidiu en que se trata dunha medida para "reducir" a carga administrativa dos centros de saúde e tamén dunha aposta polo propios test de antíxenos.

"Mentres se podía facer PCR a todos os pacientes non optamos por esa solución e fomos, efectivamente, á confirmación diagnóstica pero, no momento actual, co número de casos que temos ou cos que podemos ter nos próximos días ou semanas, parécenos adecuado", sinalou.