A economía social creceu en Galicia en 2021 con 174 novas empresas
Hai 3.150 entidades de economía social activas.
Por E.P. | SANTIAGO DE COMPOSTELA | 14/01/2022 | Actualizada ás 17:55
A economía social creceu en Galicia en 2021 ao crearse durante o ano 174 novas empresas que aglutinan 521 persoas socias promotoras, a pesar da situación pandémica. Así, segundo informa a Consellería de Emprego e Igualdade nun comunicado, a Comunidade conta con 3.150 entidades de economía social activas: 1.571 sociedades cooperativas, 1.448 laborais, 117 centros especiais de emprego e 14 empresas de inserción.
A titular da Consellería, María Jesús Lorenzana, achegou estes datos durante o pleno do Consello da Economía Social celebrado este venres, onde tamén destacou a presenza de mulleres que, no caso particular das cooperativas creadas en 2021, supoñen case o 51% das persoas socias.
"Potenciar esta fórmula de desenvolvemento económico que preconizar valores como o da solidariedade, a democracia empresarial e mesmo o apego co territorio, é unha das prioridades coas que traballou o Goberno galego", defendeu.
Ademais, apuntou que a Administración autonómica incidiu en 2021 nas actuacións de acompañamento a iniciativas de economía social, formación, divulgación e comunicación deste modelo económico, principalmente a través da Rede Eusumo, que actualmente conta con 87 entidades adheridas.
A Xunta, explicou Lorenzana, o Goberno asesorou un total de 174 proxectos de negocio e tutorizou a 278 persoas, das que o 58% foron mulleres. No que respecta á formación en economía social, celebráronse 77 cursos para mellorar as capacidades técnicas do persoal das entidades do sector nas que participaron máis de 1.000 alumnos -tamén con maioría feminina, un 68%--.
NOVO CATÁLOGO
Doutra banda, lembraron que o departamento autonómico creou en maio de 2021 o primeiro catálogo de entidades e empresas de economía social de Galicia, que reúne nun único lugar as compañías destes ámbitos que antes aparecían dispersos en diferentes rexistros administrativos.
O catálogo é en aberto e está a disposición de calquera interesado en :www.catalogoeconomiasocial.gal, Nel aparecen recollidas máis de 7.000 referencias de entidades e empresas da economía social nas que, ademais de fórmulas empresariais -cooperativas, o 22,5%; sociedades laborais, o 20,5%; empresas de inserción laboral, o 0,20% e centros especiais de emprego, o 1,6%- constan entidades doutra natureza como comunidades de montes en mancomunidade, o 42,75%; sociedades agrarias de transformación, o 10,3%; Confrarías, o 0,89%; agrupacións forestais, o 0,61%; montes de varas, 0,45%; sociedades de fomento forestal, o 0,20%; comunidades de bens, o 0,14% e mutualidades, o 0,04%.
