Denuncia que os bombeiros de Lugo lle "reventaron" o coche sen razón: "era vapor de auga, non fume"
O home asegura terlles explicado que o coche "non ardía, era que o viña de lavar", pero os efectivos non se detiveron e provocaron danos no capó.
Por Galicia Confidencial | SANTIAGO DE COMPOSTELA | 13/02/2022 | Actualizada ás 12:33
"Isto é de película". Así comeza a narración dun peculiar suceso que tivo lugar na xornada do pasado sábado no centro de Lugo. Un home denuncia que os bombeiros lle "reventaron" o coche porque pensaron que estaba ardendo cando, en realidade, se trataba simplemente de vapor de auga.
Ao parecer, e segundo relata o home nunha publicación de Facebook, os bombeiros chegaron nos apenas dez minutos que o denunciante se detivo para mercar nun supermercado. Foi ao saír cando atopou aos efectivos "reventando" o capó do coche. Nese momento, o home comezou a berrarlles que pararan porque non se trataba de fume senón de vapor de auga, xa que o coche viña de ser lavado.
Pero os bombeiros, apunta, fixeron caso omiso dos seus pregos e non pararon. O home admite que os insultou na tensión do momento e mesmo volveu a tildalos de "brutos ignorantes" na publicación referida. "É vergoñento que uns bombeiros de academia non distingan vapor de fume e cheiro de auga e cheiro de incendio; parecían actores dunha obra pesada".
O home xa apuntou que pensa reclamar "até o último céntimo" deste mal suceso, non só con respecto ao coche, que sofre danos no amentado capó, senón tamén a nivel psicolóxico "porque isto é para enfermar, tan só pensar quen son os que nos protexen dun incendio", asevera.
