Formoso cre que a "torpeza" da Consellería de Mar é a orixe do conflito entre bateeiros e mexilloeiros

O secretario xeral do PSdeG, Valentín González Formoso, asegurou que o conflito existente entre bateeiros e percebeiros orixinouse pola "torpeza" da Consellería do Mar que, segundo denunciou, tomou "decisións ás costas dos sectores implicados e sen ningún diálogo previo".

González Formoso fixo estas declaracións en Vilagarcía tras manter unha reunión cos representantes do sector mexilloeiro. Ao termo da mesma, o líder dos socialistas galegos manifestouse "moi gratamente sorprendido" polo ton construtivo dos bateeiros.

"Os seus representantes están a manter unha actitude moi positiva, apostando por sentar a dialogar nunha mesa a tres bandas e tentar arranxar o problema. É de agradecer a flexibilidade que mostran para arranxar o conflito", sinalou.

O líder socialista declarou que ve "preocupados" aos mexilloeiros "porque vai chegar a tempada de reposición do mexillón e non van ter posibilidade de acceder a el". Na súa opinión, é normal que manifesten "todas as inquietudes que pode ter un sector produtivo que necesita unha semente para poder recoller despois o froito".

González Formoso solicitou á Consellería do Mar "que sente ás partes, a dous sectores que en Galicia" se consideran "estratéxicos". Ademais, lembrou que entre os dous colectivos, aínda que houbese demandas históricas, "conviviron perfectamente e nunca houbo un conflito".

Tras a súa reunión deste mércores cos mexilloeiros, González Formoso anunciou que se reunirá a próxima semana cos percebeiros co obxectivo, segundo explicou, de "valorar o escenario, cales son as súas preocupacións a curto prazo e valorar a actuación da Administración".

O secretario xeral do PSdeG, Valentín González Formoso, mantén en Vilagarcía unha reunión cos representantes do sector mexilloeiro. PSDEG | Fonte: Europa Press