Bota a andar o selo de calidade 'Pan galego' con 44 puntos de venda
Déguense tramitando máis solicitudes de inscrición, polo que en breve aumentará o número de establecementos autorizados.
Por Europa Press / Redacción | PONTEVEDRA | 09/03/2022 | Actualizada ás 18:46
Un total de 44 establecementos pertencentes a 14 panadarías galegas venden desde este mércores as primeiras pezas baixo a indicación xeográfica protexida (IGP) Pan Galego. Así se anunciou durante o acto oficial de presentación deste selo de calidade, que estivo presidido polo director da Axencia Galega da Calidade Alimentaria, José Luís Cabarcos.
No acto, o director sinalou que as panadarías que distribúen desde este mércores o produto certificado superaron todos os controis previos, garantía do cumprimento dos requisitos establecidos no prego de condicións para a elaboración de Pan Galego. Así, venderán as pezas envasadas e identificadas cunha etiqueta numerada na que figura o logotipo da indicación xeográfica protexida, asegurando a súa rastrexabilidade en todo momento.
Así mesmo, apuntou Cabarcos, na actualidade séguense tramitando máis solicitudes de inscrición no rexistro do IGP, polo que en breve aumentará o número de puntos de venda autorizados a distribuír Pan Galego. Mantense tamén aberto o prazo para que se rexistren no IGP tanto os produtores de trigo autóctono, como os muíños e panadarías interesadas en acollerse a este novo selo de calidade.
