Por Europa Press / Redacción | SANTIAGO DE COMPOSTELA | 16/03/2022 | Actualizada ás 19:19
O presidente da Xunta e candidato a liderar o PP, Alberto Núñez Feijóo, proclamou este mércores que quere para España o que "conseguiu" en Galicia desde 2009, e á espera dos tempos que marque para a sucesión no Executivo autonómico --a dirección do partido galego terá que deixala en quince días, segundo obrigan os Estatutos--, afirmou que marcha "tranquilo" porque "hai canteira".
A mobilización do partido no acto de campaña que o seu líder celebrou en Galicia traduciuse nunhas 2.500 persoas reunidas no espazo do Museo da Cidade da Cultura reservado para o acto, no que a organización colocara unhas mil cadeiras, e que ata agora foi o máis multitudinario da campaña. Feijóo foi recibido a berros de "presidente, presidente", mentres os afiliados ondeaban numerosas bandeiras de Galicia e de España.
"Agradezo esta mobilización. Parece a praza de touros de Pontevedra!", respondeu un Feijóo emocionado, quen reservou a parte final de discurso para, en galego, tras lanzar a mensaxe de política estatal, dirixirse aos seus cunha mensaxe tranquilizadora polos cambios que se aveciñan coa súa marcha.
"Temos un dos mellores equipos políticos. Por iso me sinto moi tranquilo", aseverou, antes de remarcar que hai "canteira" e militantes cunha "enorme experiencia política" que están preparados para tomar a substitución e mesmo para conformar "varios gobernos" se fose preciso porque levan "traballando" e preparándose "durante décadas".
"Por iso estou tranquilo e sei que o que imos facer en Galicia, ímolo facer ben, como sempre, con rigor", sentenciou Feijóo, antes de despedirse asegurando que marchaba preparar a reunión semanal do Goberno, que este xoves se celebra en Lugo, continuando cunha xira itinerante que nos últimos meses o levou tamén a Ferrol e Ourense.
Na súa arenga, ademais de pedir o apoio dos seus, afirmando que non se consegue nada "só", lembrou que en dúas semanas terá que renunciar a presidir ao PPdeG. "Moito mellor ter que renunciar a que te renuncien", esgrimiu, para engadir que o fará porque "así o sinalan os Estatutos do partido" e é a súa "responsabilidade".
Coa voz entrecortada pola emoción, Feijóo garantiu aos seus que o que "nunca" deixará é a súa militancia, e chanceou con que, polo menos durante as próximas dúas semanas, aínda dirixe o PP de Galicia. Orgulloso da súa xestión na casa "común", reivindicou a súa experiencia de goberno e esgrimiu como un reto exportar ao conxunto do Estado o que conseguiu á fronte da Xunta.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.