Feijóo comparte escenario con Mañueco nun acto marcado pola sombra de Vox
O futuro presidente do PP lamenta que Mañueco non lograra maioría absoluta: "merecía un mellor resultado". Aínda que non se apuntou explicitamente a Vox, a pantasma do partido ultra está claramente presente nas palabras de Feijóo, atacado polo PSOE por ter avalado, supostamente, o acordo coa formación de Abascal.
Por Europa Press / Redacción | SANTIAGO DE COMPOSTELA | 19/03/2022 | Actualizada ás 13:20
O candidato a presidir o PP, Alberto Núñez Feijóo, defendeu que o presidente da Xunta de Castela e León en funcións, o 'popular' Alfonso Fernández Mañueco, "merecía un mellor resultado" nos comicios autonómicos do pasado 13 de febreiro, polo moito que "fixo, traballou e aguantou" nestes anos, ante o cal pediu aos seus "non conformarse".
"Non debemos conformarnos co resultado do 13 de febreiro, debemos aspirar a unha maioría indiscutible", subliñou Núñez Feijóo nun acto celebrado no Centro Cultural Miguel Delibes de Valladolid para presentar o seu proxecto co que liderar o PP nacional tras o próximo Congreso Extraordinario da formación. O apuntamento de Feijóo garda tamén relación coa incómoda postura no que a maioría simple de Mañueco deixa ao partido, obrigado a pactar con Vox para gobernar.
Precisamente, dende o PSOE xa suxeriron que a decisión en Castela e León viña avalada co visto bo de Feijóo, unha estratexia coa que o principal partido do Goberno pretende desgastar a imaxe moderada do presidente da Xunta. En calquera caso o futuro presidente do PP xustificou esta inconformismo ante o feito de que Fernández Mañueco "merecía un mellor resultado" e animou a traballar para "gañar todos xuntos" e sumar "máis votos que todos os votos xuntos" dos rivais, para o que hai que esixirse "máis, traballar máis e sacar mellores resultados".
Núñez Feijóo animou aos seus a ser "capaces de convencer" a unha maioría de cidadáns e "pelexar cada voto" coma se fose "decisivo", á vez que recoñeceu que para o seu proxecto aspira a unha maioría "que se concrete en torno ao PP", xa que este partido "é o maior punto de encontro político dos españois".
O candidato a presidir o PP mostrouse "consciente" de que nestas últimas semanas se criticou" moito" a Fernández Mañueco para poder criticalo a el e desculpouse por iso ante o preto de milleiro de asistentes reunidas no auditorio. "Espero non molestar excesivamente", sentenciou Núñez Feijóo, quen en "tan só unhas semanas" ve un PPCyL "máis unido, ilusionado e preparado que antes das eleccións".
