Por E.P. | SANTIAGO DE COMPOSTELA | 21/03/2022 | Actualizada ás 11:58
O portavoz da Sociedade Española de Médicos Xerais e de Familia, Lorenzo Armenteros, advertiu este luns de que o "alivio" ou "liberalización" de medidas contra a Covid-19 favorece o aumento de casos. "Os casos pódense incrementar por varias razóns e unha delas é a relaxación das medidas", alertou o doutor Armenteros.
Outro aspecto que pode incidir na "explosión" de contxgios, abundou, é o relativo ás "festividades". "Esta variante que agora mesmo existe é unha variante que é máis difícil de detectar, pero ten unha gran capacidade de contaxios e isto fai que repunten os casos tras a relaxación das medidas", comentou.
"Fixémonos máis flexibles dentro da situación que temos. A máscara en interiores segue sendo obrigatoria, pero esta perspectiva que se nos pon por diante de reducir as máscaras en interiores ou reducir o número de probas de antíxenos ou quizá a máis perigosa que é que os asintomáticos poidan facer unha vida normal", apuntou respecto da subida do número de contaxiados.
Este médico lucense puxo de relevo que "agora" se está "nunha situación de incerteza porque non se reúnen as condicións adecuadas para liberalizar as medidas e toda a presión política é que se reduzan". "Os criterios políticos impóñense aos de índole científico e técnico", afeou.
En canto a unha cuarta dose da vacina, Lorenzo Armenteros puntualizou que "esta é unha opción que se expón en situacións moi concretas e en persoas inmunitarias deficientes". "Unha cuarta dose de forma xeneralizada tería que darse de forma regulada e sabendo como está a inmunidade nun grupo de persoas. Que teñamos ese estudo que nos confirme a súa necesidade", apremou.
Finalmente, sobre o incremento de contaxios, Armenteros resolveu que é unha subida que "non sobrecarga os hospitais, nin as UCIs". "Os casos increméntanse a pesar de que se modificaron as datas de notificacións, dúas veces á semana. Talvez se se dese de forma diaria veriamos un aumento máis significativo", concluíu o portavoz da Sociedade Española de Médicos Xerais e de Familia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.