Folga de universitarios contra as reformas educativas

As asociacións Estudantes en Movemento e Fronte de Estudantes celebraron este xoves unha Folga Xeral Estudantil para expresar o seu rexeitamento ás reformas educativas. Ambas as entidades critican a Lei Orgánica de Sistema Universitario (LOSU) e a Lei de Convivencia Universitaria (LCU) que, segundo explicou o portavoz na Coruña de Estudantes en Movemento, Alejandro Esteban, "están a tentar impor" desde o Ministerio de universidades cos "votos en contra" de todo o profesorado e os sindicatos obreiros e estudantís.

"Ao final estas votacións sempre adoitan ser non vinculantes, así que os borradores seguen adiante", sinalou Esteban, quen afirmou que tiveron "varias reunións co propio Ministerio de universidades" para transmitirlle as súas reivindicacións.

Os estudantes demandan un "aumento do número de bolsas" e que se faga máis doado o acceso a elas, así como a "gratuidade completa" do sistema universitario, segundo explicou o seu portavoz. "É necesario que exista un tipo de bolsa salario", relata, para que calquera alumno poida estudar sen depender da súa situación económica.

Por outra banda, os alumnos tamén solicitan a "laboralización de todas as prácticas", tanto curriculares como extracurriculares, porque en "moitísimas" facultades se fan prácticas en empresas "de forma completamente gratuíta e sen haber ningún tipo de contrato".

Esteban argumentou que están "en contra" da LOSU porque "de todas as achegas" que fixeron os alumnos, "non está ningunha aprobada" e engade que "se lle vai dar moito máis poder" ao Consello Social, órgano no que hai "un 30% de axentes externos á universidade, que basicamente son empresas" e van ter "moita máis capacidade" de elección dentro da propia universidade. "Podendo elixir mesmo por enriba do Reitorado, que graos se imparten e onde hai que pór diñeiro", sentenciou o portavoz.

"Esta folga estamos a expola como punta de lanza", indicou Alejandro Esteban, quen explicou que nos últimos anos houbo "moi pouco" movemento estudantil e agora están a tentar "xerar de novo estruturas" que traballen para defender os propios dereitos dos alumnos.

Respecto ao seguimento deste paro, o portavoz afirmou que "unha gran porcentaxe" dos estudantes da Universidade da Coruña (UDC) están a secundar a folga. "Na Escola de Camiños practicamente non veu ninguén e en Socioloxía nin sequera impartíronse clases hoxe", asegurou.

Ademais da folga, os estudantes convocaron concentracións en 24 cidades de España. Na Coruña, realizouse esta mañá fronte á facultade informática "para facer un pouco de ruído" e ler un manifesto con "todas as reivindicacións", indicou Estaban e lembrou que este xoves ás 19,00 horas haberá outra concentración na facultade de Historia da Universidade de Santiago.